پی ایس ایل 6 کے بقایا میچز جون میں کرانے کا فیصلہ
پاکستان کرکٹ بورڈ (پی سی بی) نے کرونا وائرس سے متاثر ہونے والے پاکستان سپر لیگ (پی ایس ایل) کے چھٹے ایڈیشن کے بقایا میچز جون میں کرانے کا فیصلہ کیا ہے۔
پی سی بی نے جمعرات کو ایونٹ میں شریک فرنچائز مالکان سے ورچوئل میٹنگ کی جس کے دوران ایونٹ کے دوبارہ انعقاد پر تبادلہ خیال کیا۔
پی سی بی کی جانب سے جاری اعلامیے کے مطابق تمام چھ فرنچائز مالکان نے ایونٹ کے جون میں انعقاد پر متفقہ طور پر رضامندی کا اظہار کیا ہے۔
پی سی بی کے مطابق پی ایس ایل 6 کے تمام بقایا میچز کراچی میں ہی کھیلے جائیں گے۔
امریکہ میں زندگی ستمبر تک معمول پر آ سکتی ہے: ڈاکٹر فاؤچی
امریکہ میں متعدی امراض کے ماہر ڈاکٹر انتھونی فاؤچی نے کہا ہے کہ شہریوں کو ویکسین لگائے جانے کی حالیہ رفتار سے ظاہر ہوتا ہے کہ امریکہ اگست کے آخر یا ستمبر کے شروع میں عالمی وبا سے پہلے کی معمول کی زندگی پر واپس لوٹ سکتا ہے۔
ڈاکٹر فاؤچی نے ان خیالات کا اظہار وائٹ ہاؤس کووڈ نائنٹین رسپانس ٹیم کی جانب سے ہرڈ امیونیٹی سے متعلق آن لائن بریفنگ کے دوران کیا۔
فاؤچی نے کہا کہ جب 70 سے 85 فی صد امریکی آبادی کو ویکسین لگ چکی ہو گی اور لوگوں میں ہرڈ امیونیٹی یعنی کرونا کے خلاف مدافعت پیدا کرنے کی صلاحیت پیدا ہو جائے گی تو مطلوبہ اہداف پورے ہو جائیں گے۔
انہوں نے کہا کہ جس شرح سے موجودہ وقت میں ویکسین لگائی جا رہی ہے۔ اگر اس کی یومیہ تعداد 20 سے 30 لاکھ ہو جائے تو معاشرے کو مزید تحفظ فراہم کیا جا سکتا ہے۔
بنگلہ دیش: کرونا ویکسین کی شروعات ڈھاکہ کے بڑے قحبہ خانے سے
بنگلہ دیش کے دارالحکومت ڈھاکہ کے علاقے دولت دیا میں قائم سب سے بڑے قحبہ خانے، میں حکام نے کرونا وائرس کی ویکسین لگانے کا عمل شروع کر دیا ہے۔
حکام کا کہنا ہے کہ ان کا منصوبہ ہے کہ وہ اس علاقے کے تمام رہنے والوں کو ویکسین لگانا چاہتے ہیں۔
خبر رساں ایجنسی اے ایف پی کے مطابق بنگلہ دیش کے دارالحکومت ڈھاکہ میں واقع دولت دیا کے علاقے میں 1900 کے قریب موجودہ اور سابقہ سیکس ورکر رہائیش پذیر ہیں۔ ان میں سے اکثر کی عمریں 15 برس سے لے کر 40 برس تک کی ہیں۔
دولت دیا علاقے میں ویکسین کی مہم کے سربراہ ڈاکٹر آصف محمود کا کہنا ہے کہ اب تک 150 سیکس ورکروں کو کرونا وائرس کی ویکسین لگ چکی ہے۔
بنگلہ دیش میں 40 سال سے زیادہ عمر کے افراد کے لیے ویکسین لگانے کا عمل شروع ہو چکا ہے مگر حکام نے دولت دیا کے علاقے کے لیے یہ شرط ختم کر دی ہے۔
امریکہ کی جانسن اینڈ جانسن کی ویکسین کی 10 کروڑ خوراکیں خریدنے کی منصوبہ بندی
امریکہ کی حکومت جانسن اینڈ جانسن سے کرونا وائرس کی ویکسین کی 10 کروڑ خوراکیں خریدنے کی منصوبہ بندی کر رہی ہے۔
جانسن اینڈ جانسن ویکسئین کی صرف ایک ہی خوراک دی جاتی ہے۔ توقع کی جا رہی ہے کہ صدر جو بائیڈن جانسن اینڈ جانسن اور مرک اینڈ کمپنی کے حکام سے ملاقات کے دوران یہ اعلان کر یں گے۔
امریکی دوا ساز کمپنی مرک ویکسین تیار کرنے کے لیے امریکی فرم جانسن اینڈ جانسن کے ساتھ شراکت دار ہے۔
امریکہ جانسن اینڈ جانسن کو پہلے ہی 10 کروڑ خوراکوں کا آرڈر دے چکا ہے۔
خبر رساں ادارے 'رائٹرز' کے مطابق جانسن اینڈ جانسن رواں ہفتے کوئی ویکسین فراہم نہیں کر سکے گی۔
'این بی سی نیوز' کے مطابق امریکہ نے پہلے ہی ویکسین تیار کرنے والوں کے ساتھ معاہدے کر لیے ہیں جس کے نتیجے میں ہر امریکی بالغ فرد کے لیے خوراک فراہم ہو سکے گی۔
اخبار 'واشنگٹن پوسٹ' کی رپورٹ کے مطابق امریکہ کی حکومت نے موڈرنا اور فائزر اور بائیو این ٹیک کی تیار کردہ دو ویکسین کے 60 کروڑ خوراکوں کا پہلے ہی آرڈر دے چکا ہے۔ ان دونوں ویکسین کی دو دو خوراکیں لگنی ہیں اس لیے یہ خوراکیں 30 کروڑ افراد کے لیے کافی ہوں گی۔ جو کہ ممکنہ طور ہر اگلے چار ماہ میں لگائی جا سکیں گی۔
رپورٹ کے مطابق امریکہ میں 26 کروڑ افراد ویکسین لگوانے کے اہل ہیں۔