پاکستان میں وبا کی تیسری لہر کی آمد کی تصدیق
پاکستان کے وزیرِ اعظم عمران خان کے معاونِ خصوصی برائے صحت ڈاکٹر فیصل سلطان نے کہا ہے کہ پاکستان میں واضح طور پر کرونا وائرس کی نئی لہر آ چکی ہے۔
ڈاکٹر فیصل سلطان نے ایک ویڈیو بیان میں کہا کہ بالخصوص پنجاب کے بڑے شہروں سمیت پورا پاکستان کرونا وائرس کی نئی لہر کی زد میں ہے۔
ان کا مزید کہنا تھا کہ دنیا بھر میں وائرس کی نئی اقسام آ چکی ہیں۔ یہ بھی دیکھا گیا ہے کہ نئی اقسام تیزی سے پھیلتی ہیں۔یہ بھی خدشہ ظاہر کیا گیا کچھ اقسام بہت زیادہ خطرناک بھی ہو سکتی ہیں۔
معاونِ خصوصی برائے صحت نے کہا کہ اگر ہم نے احتیاط کا دامن ہاتھ سے چھوڑ دیا تو یہ لہر پورے پاکستان میں پھیل سکتی ہے۔
انہوں نے عوام سے درخواست کی کہ حکومت کی طرف سے وضع کردہ احتیاطی تدابیر پر سختی سے عمل کریں۔
ڈاکٹر فیصل سلطان کے مطابق مریضوں کی تعداد میں اضافہ ہو رہا ہے۔ عوام وائرس سے خود بھی بچیں اور اپنے پیاروں کو بھی بچائیں۔
کرونا بحران میں 'لٹل پاکستان' کے کاروباری پریشان
امریکہ کا نیویارک شہر کرونا وائرس کی عالمی وبا کا مرکز رہا ہے۔ نیویارک کے علاقے 'کونی آئی لینڈ' کو پاکستانیوں کا گڑھ ہونے کے وجہ سے 'لٹل پاکستان' بھی کہا جاتا ہے۔ 'لٹل پاکستان' بھی کرونا بحران میں بری طرح متاثر ہوا۔ اب ایک سال بعد یہاں کی صورتِ حال کیسی ہے؟ جانتے ہیں آؤنشمن آپٹے کی رپورٹ میں۔
برطانیہ میں وبا کی سامنے والی قسم مہلک قرار
اقوامِ متحدہ کی جانب سے کرونا وائرس کو عالمی وبا قرار دیے ہوئے ایک سال مکمل ہو گیا ہے۔
وبا کا ایک سال مکمل ہونے پر شائع ہونے والی ایک رپورٹ میں کہا گیا ہے کہ برطانیہ میں سامنے آنے والی کرونا وائرس کی نئی قسم دیگر تمام اقسام سے زیادہ مہلک ہے۔
'برٹش میڈیکل جرنل' میں بدھ کو شائع ہونے والی رپورٹ میں بتایا گیا ہے کہ کرونا وائرس کی نئی برطانوی قسم کا نشانہ جو افراد بنے ہیں، ان میں دیگر اقسام سے متاثر ہونے والوں کے مقابلے میں موت کا امکان 64 فی صد زیادہ ہے۔
گزشتہ ستمبر میں جنوب مشرقی برطانیہ سے پھیلنے والی کرونا وائرس کی نئی قسم اب دنیا کے 100 سے زیادہ ممالک میں پہنچ چکی ہے۔ اس سے قبل ہونے والی ریسرچز میں یہ بات بھی سامنے آئی ہے کہ یہ قسم کرونا وائرس کی اصل قسم سے کہیں زیادہ تیزی سے پھیلتی ہے۔
دوسری طرف اقوامِ متحدہ کی جانب سے کرونا وائرس کو عالمی وبا قرار دیے جانے کو ایک سال مکمل ہو گیا ہے۔ اس موقع پر برازیل میں کرونا وائرس سے ایک ہی دن میں ریکارڈ 2286 اموات رپورٹ ہوئی ہیں۔
کرونا وائرس: سابق صدر کی ویکسی نیشن پر خصوص ویڈیو
امریکہ کے چار سابق صدور ایک نئی اشتہاری مہم میں حصہ لے رہے ہیں جس کا مقصد کرونا وائرس کی ویکسین لگانے کے لیے لوگوں کی حوصلہ افزائی کرنا ہے۔
ایڈ کونسل کی تیار کردہ ویڈیو میں سابق صدر بل کلنٹن کا کہنا ہے کہ ہم کافی لوگوں کو کھو چکے ہیں اور ہمیں کافی نقصان اٹھانا پڑا ہے۔
اس اشتہار میں بل کلنٹن اور ان کی اہلیہ ہلیری کو ایک تصویرمیں ویکسین لیتے ہوئے دکھایا گیا ہے۔
سابق صدر جارج ڈبلیو بش کا کہنا ہے کہ وبا سے جان چھڑانے کے لیے ضروری ہے کہ شہری ویکسین لیں۔
ویڈیو میں کلنٹن کی طرح بش اور ان کی اہلیہ لارا کو انجیکشن کے ذریعے ویکسین لیتے ہوئے دکھایا گیا ہے اور اسی طرح سابق صدر براک اوباما اور ان کی اہلیہ مشیل اوباما، سابق صدر جمی کارٹر اور ان کی اہلیہ روزلین بھی شامل ہیں۔
سابق رہنما ویکسین لینے کے بعد اپنے محفوظ ہونے کے بارے میں بات کرتے ہیں۔
اوباما کا کہنا تھا کہ وہ مشیل کی والدہ سے گلے ملنا اوران کی سالگرہ کے موقع پر اکھٹا ہونا چاہتے ہیں۔
جارج بش نے کہا کہ وہ ٹیکساس رینجرز کے اسٹیڈیم میں پورے ہجوم کے درمیان میجر لیگ بیس بال کے سیزن کا آغاز دیکھنے کے منتظر ہیں۔
جمی کارٹر کے پیغام پر اشتہار کا خاتمہ ہوتا ہے جس میں وہ کہہ رہے ہیں کہ (فیصلہ) آپ پر منحصر ہے۔
سابق صدر ڈونلڈ ٹرمپ اشتہار میں شامل نہیں ہیں۔ وہ گزشتہ برس کرونا وائرس سے متاثر ہونے کے بعد اسپتال میں زیرِ علاج بھی رہے تھے۔
ویڈیو میں ناظرین کو ایک ایسی ویب سائٹ کے بارے میں بھی بتایا گیا ہے جس میں مختلف دستیاب ویکسینز کے بارے میں معلومات دی گئی ہیں۔