بھارت میں رواں سال میں ریکارڈ یومیہ کیسز رپورٹ
بھارت میں اتوار کو رواں سال میں کرونا وائرس کے یومیہ ریکارڈ کیسز رپورٹ ہوئے جن کی تعداد 25 ہزار سے زائد تھی۔
دنیا بھر میں امریکہ اور برازیل کے بعد کرونا وبا سے سب سے زیادہ متاثرہ ملک بھارت میں یومیہ کیسز کی ریکارڈ تعداد وبا کا گڑھ سمجھے جانی والی ریاست مہاراشٹرا میں لگائے جانے والے لاک ڈاؤن سے ایک روز قبل سامنے آئی ہے۔
وزارتِ صحت کے اعداد و شمار کے مطابق بھارت میں اب تک ایک کروڑ 13 لاکھ سے زائد افراد وبا سے متاثر اور ایک لاکھ 58 ہزار سے زائد اموات ہو چکی ہیں۔
ریاست مہاراشٹرا سے سب سے زیادہ لگ بھگ 23 لاکھ کرونا کیسز رپورٹ ہوئے ہیں۔ جب کہ ناگ پور ضلع میں پیر سے لاک ڈاؤن بھی لگایا جا رہا ہے۔
پاکستان میں کرونا سے مزید 29 اموات، 2253 نئے کیس
پاکستان میں کرونا وائرس کی تیسری لہر جاری ہے اور ملک میں مجموعی کیسز کی تعداد چھ لاکھ سات ہزار سے تجاوز کر گئی ہے۔
وائرس کا پھیلاؤ روکنے کے لیے پنجاب کے بڑے شہروں میں آج سے لاک ڈاؤن کی پابندیوں کا آغاز ہو رہا ہے جس کے تحت لاہور سمیت پنجاب کے سات بڑے شہروں میں کاروباری مراکز شام چھ بجے بند ہو جائیں گے۔
سرکاری اعداد و شمار کے مطابق ملک میں گزشتہ 24 گھنٹوں کے دوران کرونا کے 44 ہزار 61 ٹیسٹ کیے گئے جس میں سے دو ہزار 253 کے نتائج مثبت آئے، اس طرح ملک میں مجموعی کرونا کیسز کی تعداد چھ لاکھ سات ہزار 453 تک پہنچ گئی۔
گزشتہ 24 گھنٹوں کے دوران پاکستان میں کرونا وائرس سے 29 افراد ہلاک ہوئے اور اس طرح مجموعی اموات 13 ہزار 537 تک پہنچ گئی ہیں۔
اعداد و شمار کے مطابق ملک میں کرونا وائرس کے مجموعی کیسز میں سے پانچ لاکھ 71 ہزار 878 افراد صحت یاب ہو چکے ہیں۔
اٹلی کے آدھے سے زائد علاقوں میں سخت لاک ڈاؤن
دنیا کے مختلف ممالک میں کرونا وائرس کی نئی لہر تیزی سے پھیل رہی ہے اور یورپی ملک اٹلی کے نصف خطے میں وائرس کے پھیلاؤ کے سبب سخت پابندیاں عائد کر دی گئی ہیں۔
خبر رساں ادارے 'ایسوسی ایٹڈ پریس' کے مطابق اٹلی کے نصف خطے میں کرونا وائرس کے حالیہ پھیلاؤ کو روکنے کے لیے سخت لاک ڈاؤن لگا دیا گیا ہے۔ کرونا وائرس کی اس حالیہ لہر کے باعث ایک بار پھر اسپتالوں میں گنجائش کم پڑ رہی ہے۔
پیر کو نو علاقوں میں ڈے کیئر سینٹرز اسکولز اور دکانیں بند رہیں۔
اس کے علاوہ ملک کے دیگر حصوں میں اس سے کم درجے 'اورنج' سطح کا لاک ڈاؤن نافذ کیا گیا ہے۔
بھارت میں رواں سال کرونا کے ریکارڈ 26 ہزار یومیہ کیس
بھارتی ذرائع ابلاغ کی رپورٹس کے مطابق بھارت میں پیر کو 26 ہزار 291 نئے کرونا کیس رپورٹ ہوئے ہیں جو رواں سال رپورٹ ہونے والے کیسز کی سب سے زیادہ تعداد ہے۔
بھارت کی وزارتِ صحت کے مطابق پانچ ریاستوں مہاراشٹر، پنجاب، کرناٹک، گجرات اور تمل ناڈو میں کرونا کے یومیہ کیسز میں اضافہ دیکھا گیا۔
گزشتہ 24 گھنٹوں کے دوران ریکارڈ ہونے والے 26 ہزار 291 کیسز میں سے 16 ہزار 620 کیسز ریاست مہاراشٹر میں رپورٹ ہوئے، اس کے علاوہ ریاست کیرالہ میں 1792 جب کہ پنجاب میں 1492 نئے کیسز رپورٹ ہوئے۔
بھارت میں رواں سال کے ریکارڈ نئے کیسز کے بعد ملک میں متاثرہ افراد کی مجموعی تعداد ایک کروڑ 13 لاکھ 85 ہزار 339 ہو گئی ہے۔
پیر کو بھارت میں 118 افراد کرونا وائرس سے ہلاک بھی ہوئے جس سے مجموعی ہلاکتوں کی تعداد ایک لاکھ 58 ہزار 725 ہو گئی ہے۔