پاکستان: مثبت کیسز کی شرح میں اضافہ
پاکستان میں بھی کرونا وائرس کے کیسز میں ایک مرتبہ پھر اضافہ دیکھا جا رہا ہے اور ملک میں مجموعی کیسز کی تعداد چھ لاکھ 15 ہزار 810 ہو گئی ہے۔
سرکاری اعداد و شمار کے مطابق ملک میں گزشتہ 24 گھنٹوں میں 44 ہزار 377 افراد کے ٹیسٹ کیے گئے جس میں سے تین ہزار 495 کے نتائج مثبت آئے ہیں۔ اس طرح پاکستان میں گزشتہ 24 گھنٹوں کے دوران مثبت کیسز کی شرح سات اعشاریہ آٹھ فی صد ریکارڈ کی گئی۔
پاکستان میں رپورٹ ہونے والے نئے کیسز چھ دسمبر 2020 کے بعد سے یومیہ کیسز کی سب سے زیادہ تعداد ہے۔
علاوہ ازیں ملک میں مزید 61 افراد کرونا وائرس کی وجہ سے انتقال کر گئے اور اس طرح مجموعی ہلاکتیں 13 ہزار 717 تک جا پہنچی ہیں۔
پاکستان: سخت پابندیوں کا عندیہ
پاکستان کے وفاقی وزیر ترقی و منصوبہ بندی اسد عمر نے کرونا وائرس کے بڑھتے ہوئے کیسز اور احتیاطی تدابیر پر عمل درآمد نہ کرنے کی صورت میں سخت پابندیوں کا عندیہ دیا ہے۔
ایک ٹوئٹ میں اسد عمر نے کہا کہ کرونا کے مثبت کیسز میں واضح اضافہ دیکھا گیا ہے اور اسپتالوں میں مریضوں کے داخلوں اور لوگوں کی انتہائی نگہداشت کے کیسز بڑھ رہے ہیں۔
انہوں نے کہا کہ اگر ایس او پیز پر عمل درآمد میں بہتری نہ لائی گئی تو عوام کی سرگرمیوں پر سخت پابندیاں لگانے پر مجبور ہوں گے۔
بھارت میں دسمبر 2020 کے بعد ریکارڈ کیسز رپورٹ
بھارت میں کرونا وائرس کے کیسز بڑھ رہے ہیں اور گزشتہ 24 گھنٹوں میں 35 ہزار 871 افراد میں وائرس کی تشخیص ہوئی ہے۔
جمعرات کو سامنے آںے والے اعداد و شمار کے مطابق ریاست مہاراشٹرا کرونا سے سب سے زیادہ متاثر ہے جہاں صرف اسی ریاست میں رپورٹ ہونے والے کیسز کی تعداد 23 ہزار سے زیادہ ہے۔
یاد رہے کہ بھارت میں دسمبر کے اوائل کے بعد سے یومیہ کیسز کی سب سے زیادہ تعداد رپورٹ ہوئی ہے۔
نئے کیسز کے بعد بھارت میں مجموعی کرونا کیسز کی تعداد ایک کروڑ 14 لاکھ 74 ہزار 605 ہو گئی ہے۔
فلسطینی کرونا ویکسین سے محروم کیوں؟
غزہ اور مغربی کنارے کی بستیوں میں کرونا وائرس کے کیسز بڑھ رہے ہیں۔ زیادہ تر فلسطینیوں کو اب تک ویکسین میسر نہیں ہے۔ اسرائیل کی حکومت ان فلسطینی مزدوروں کو ویکسین لگا رہی ہے جو یہودی بستیوں میں کام کرتے ہیں۔ لیکن انسانی حقوق کی تنظیموں کا مطالبہ ہے کہ اسرائیل تمام فلسطینیوں کو ویکسین مہیا کرے۔
