پاکستان میں 3600 سے زیادہ کیسز رپورٹ
پاکستان میں گزشتہ چوبیس گھنٹوں کے دوران کرونا وائرس کے تین ہزار 669 کیسز رپورٹ ہوئے ہیں جب کہ عالمی وبا کے شکار مزید 20 مریض دم توڑ گئے۔
سرکاری اعداد و شمار کے مطابق گزشتہ چوبیس گھنٹوں میں 43 ہزار سے زیادہ افراد کے کرونا ٹیسٹ کیے گئے جن میں سے 3600 سے زیادہ کے نتائج مثبت آئے ہیں۔
پاکستان میں کیسز کی مجموعی تعداد چھ لاکھ 30 ہزار 471 ہو گئی ہے جن میں سے حکام کے مطابق پانچ لاکھ 83 ہزار سے زیادہ صحت یاب ہو چکے ہیں۔
پاکستان میں اب بھی 2423 مریضوں کی حالت تشویش ناک بتائی جاتی ہے۔
پاکستان: کیسز بڑھنے پر پابندیاں مزید سخت کرنے کا فیصلہ
پاکستان کے وفاقی وزیر برائے منصوبہ بندی اسد عمر نے کہا ہے کہ ملک میں کرونا وائرس کے تیزی سے پھیلاؤ کے پیش نظر پابندیوں میں اضافے کا فیصلہ کیا گیا ہے۔
اپنے ایک ٹوئٹ میں اسد عمر نے بتایا کہ نیشنل کمانڈ اینڈ آپریشن سینٹر (این سی او سی) کے پیر کی صبح ہونے والے اجلاس میں کرونا وائرس کے پھیلنے کا اضافہ بننے والی سرگرمیوں پر پابندیاں مزید سخت کرنے کا فیصلہ کیا ہے۔
انہوں نے کہا کہ صوبائی اور وفاقی دارالحکومت اسلام آباد کی انتظامیہ کو ہدایت کی گئی ہے کہ ایس او پیز پر سختی سے عمل درآمد کرایا جائے اور خلاف ورزی کی صورت میں کارروائی کی جائے۔
'ایسٹرازینیکا ویکسین لگ بھگ 80 فی صد مؤثر ہے'
برطانوی دوا ساز کمپنی ایسٹرازینیکا کا کہنا ہے کہ ان کی تیار کردہ کرونا ویکسین وبا کے خلاف لگ بھگ 80 فی صد مؤثر ہے۔
کمپنی کا کہنا ہے کہ ویکسین معمر افراد کو وبا کے اثرات سے محفوظ رکھنے کے لیے کارآمد ہے اور اس سے خون کے جمنے کا بھی کوئی خطرہ نہیں۔
ایسٹرازینیکا کی ویکسین لگانے کے بعد خون جمنے کی خبریں گردش کرنے پر یورپ کے کئی ملکوں نے ویکسین لگانے کا عمل روک دیا تھا۔
تاہم کمپنی نے پیر کو اپنے ایک بیان میں کہا ہے کہ ویکسین کے تیسرے مرحلے کے ٹرائل امریکہ میں ہوئے جس میں 32 ہزار 449 رضاکاروں نے حصہ لیا۔
بیان میں کہا گیا ہے کہ رضاکاروں میں تقریباً 20 فی صد 65 برس یا اس سے زائد عمر کے افراد شامل تھے۔ تحقیق میں نتیجہ اخذ کیا گیا ہے کہ ویکسین نہ صرف معمر افراد کے لیے مؤثر ہے بلکہ کسی بھی عمر کے نوجوان فرد کو یہ وائرس سے تحفظ فراہم کر سکتی ہے۔
کمپنی کا کہنا ہے کہ وہ اپنے تجربات کے اخذ کردہ نتائج امریکہ کے فوڈ اینڈ ڈرگ ایڈمنسٹریشن کے حکام کے پاس جمع کرانے کے لیے تیار ہیں تاکہ ویکسین ہنگامی بنیاد پر استعمال کی جا سکے۔
فلسطین: مریضوں اور بزرگوں کو ویکسین دی جا سکے گی
فلسطین کی وزارتِ صحت کا کہنا ہے کہ صحت کے شعبے سے وابستہ ہزاروں افراد سمیت بزرگوں اور مریضوں کو اتوار سے ویکسین دی جا سکے گی۔
اقوامِ متحدہ کے ویکسین کی تقسیم کے پروگرام کوویکس کے تحت فلسطین کو فائزر اور بائیو این ٹیک اور ایسٹرازینیکا کی لگ بھگ 60 ہزار خوراکیں مل گئی ہیں۔
فلسطینی اتھارٹی کو چین سے بھی ایک لاکھ خوراکیں ملنے کی توقع ہے۔
گزشتہ چند ہفتوں کے دوران فلسطین میں کرونا وائرس کے کیسز میں تیزی سے اضافہ ہوا ہے اور اسپتالوں پر بھی مریضوں کا دباؤ بڑھ گیا ہے۔
مشرقِ وسطیٰ کے لیے اقوامِ متحدہ کے سفیر تور وینس لینڈ کے مطابق ویکسی نیشن کے عمل سے فلسطین کے صحت کے نظام پر دباؤ کو کم کیا جا سکے گا۔ ویکسی نیشن کا عمل آگے بڑھنے کے لیے پہلا قدم ہے۔