بھارت میں کیسز میں اضافہ، ٹنڈولکر بھی وبا سے متاثر
بھارت میں کرونا وائرس کے کیسز میں اضافہ ہو رہا ہے۔ سابق مایہ ناز بلے باز سچن ٹنڈولکر نے بھی ہفتے کو وبا سے متاثر ہونے کی تصدیق کی ہے۔
سچن ٹنڈولکر کا ٹوئٹ میں کہنا تھا کہ وہ وبا سے محفوظ رہنے کے لیے تمام احتیاطی تدابیر اختیار کر رہے تھے۔ تاہم ان میں وبا کی معتدل علامات پائی جاتی ہیں۔
ان کے بقول ان کا کرونا ٹیسٹ پازیٹو آیا ہے۔
ٹنڈولکر کا مزید کہنا تھا کہ گھر کے دیگر افراد کے کرونا ٹیسٹ منفی آئے ہیں اور انہوں نے اپنے آپ کو گھر میں قرنطینہ کر لیا ہے۔ وہ ڈاکٹر کی ہدایات پر عمل کر رہے ہیں۔
بھارت میں ہفتے کو 62 ہزار سے زائد مزید کییسز رپورٹ کیے گئے جو کہ پچھلے سال اکتوبر کے بعد سب سے زیادہ ہیں۔
بھارت مییں اب تک ایک کروڑ 19 لاکھ افراد وبا سے متاثر اور ایک لاکھ 61 ہزار سے زائد ہلاک ہو چکے ہیں۔
کرونا کے باعث ٹی بی کے خلاف کوششوں کو شدید نقصان
وائس آف امریکہ کا مستقل سلسلہ 'لائف 360' صحت مند زندگی گزارنے کے بارے میں معلومات پر مشتمل ہے۔ آج کا موضوع ٹی بی یا تپ دق کے بارے میں ہے۔ کرونا وائرس کی وبا نے ٹی بی کے خلاف کوششوں کو کس طرح متاثر کیا ہے؟ اس بارے میں جانتے ہیں صبا شاہ خان کی اس ویڈیو میں۔
زمینی سے اسپین آنے والوں کے کرونا ٹیسٹ کی منفی رپورٹ لازمی قرار
یورپ کے ملک اسپین کی وزارتِ صحت نے فرانس سے آنے والے مسافروں میں بڑھتے ہوئے کرونا کیسز کے پیشِ نظر ہفتے کو اعلان کیا ہے کہ فرانس سے بذریعہ زمینی راستہ اسپین آنے والوں کو کرونا ٹیسٹ کی منفی رپورٹ پیش کرنی ہو گی۔
وزارتِ صحت کا کہنا ہے کہ زیادہ متاثرہ علاقوں سے اسپین آنے والے مسافروں کو سفر کرنے سے 72 گھنٹے پہلے کرونا ٹیسٹ کرانا ہو گا۔
تاہم یہ پابندی ٹرک ڈرائیورز، سرحدوں کے آر پار کام کرنے والوں اور سرحد سے 30 کلو میٹر کی حدود میں رہنے والوں پر لاگو نہیں ہو گی۔
خیال رہے کہ متعدد فرانسیسی افراد اپنے ملک میں کرونا وبا کے سبب نافذ کردہ لاک ڈاؤن سے راہ فرار ااختیار کرتے ہوئے سرحد پار اسپین کے شہر میڈرڈ میں قحبہ خانوں اور ریستورانوں کا رُخ کر رہے ہیں۔
پاکستان میں کرونا کے وار جاری، پابندیاں مزید سخت کرنے پر غور
پاکستان میں کرونا وائرس کی تیسری لہر جاری ہے۔ ملک میں گزشتہ 24 گھنٹوں میں چار ہزار 767 کیسز رپورٹ ہوئے ہیں۔
اتوار کو رپورٹ ہونے والے کیسز 20 جون کے بعد ایک روز میں رپورٹ ہونے والے کرونا کے سب سے زیادہ کیسز ہیں۔
سرکاری اعداد و شمار کے مطابق گزشتہ 24 گھنٹوں میں ملک میں 45 ہزار 656 افراد کے کرونا ٹیسٹ کیے گئے، جس میں مثبت کیسز آنے کی شرح 10.44 فی صد تھی۔
ملک میں کرونا سے 57 ہلاکتیں بھی ہوئی ہیں، اس طرح مجموعی اموات 14 ہزار 215 ہو گئی ہیں۔
ادھر نیشنل کمانڈ اینڈ آپریشن سینٹر (این سی او سی) نے کرونا کیسز میں مسلسل اضافے پر تشویش کا اظہار کیا ہے۔
وفاقی وزیر منصوبہ بندی اسد عمر کا کہنا ہے کہ عوام کرونا ایس او پیز پر سختی سے عمل کریں ورنہ پابندیاں مزید سخت کی جا سکتی ہیں۔