حفیظ شیخ کا کرونا ٹیسٹ مثبت آیا ہے، وزیرِ خزانہ حماد اظہر کا ٹوئٹ
ویکسین کی خریداری کے لیے 50 کروڑ روپے مختص کیے ہیں: وزیرِ صحت سندھ
وزیرِ صحت سندھ عذرا پیچوہو نے کہا ہے کہ وفاق نے ویکسین خریدنے کی اجازت دی ہے جس کے بعد 500 ملین روپے ویکسین کی خریداری کے لیے رکھے ہیں۔
کراچی میں پریس کانفرنس کے دوران عذرا پیچوہو کا کہنا تھا کہ کراچی میں اس وقت 29 ویکسین سینٹرز موجود ہیں جہاں لوگوں کو مفت ویکسین دی جا رہی ہے۔
انہوں نے بتایا کہ سندھ میں برطانیہ میں پائی جانے والی کرونا کی قسم کا کوئی کیسز موجود نہیں۔ البتہ اگر یہ کرونا کی برطانوی قسم سندھ آگئی تو بہت سے لوگ اس سے متاثر ہوں گے۔
وزیرِ اعظم عمران خان کرونا سے مکمل صحت یاب ہو گئے ہیں: سینیٹر فیصل جاوید
پاکستان تحریکِ انصاف کے رہنما سینیٹر فیصل جاوید کا کہنا ہے کہ وزیرِ اعظم عمران خان کرونا سے مکمل طور پر صحت یاب ہو گئے ہیں اور احتیاطی تدابیر کے ساتھ اُنہوں نے سرکاری اُمور بھی نبھانا شروع کر دیے ہیں۔
اپریل کے وسط تک ویکسین کی مزید لاکھوں خوراکیں دستیاب ہوں گی: اسد عمر
وفاقی وزیر منصوبہ بندی اسد عمر نے کہا ہے کہ اپریل کے وسط تک پاکستان کو کرونا ویکسین کی مزید کئی لاکھ خوراکیں دستیاب ہوں گی۔
منگل کو ایک ٹوئٹ میں اسد عمر کا کہنا تھا کہ چین کی تیار کردہ 'کین سائنو' ویکسین کی پہلی کھیپ پاکستان کو موصول ہو گئی ہے۔
اُن کا کہنا تھا کہ یہ وہی ویکسین ہے جس کے فیز تھری ٹرائلز میں پاکستان نے حصہ لیا تھا۔
اُن کا کہنا تھا کہ یہ ویکسین بلک میں درآمد کی جائے گی جس کے بعد اسے پاکستان میں پیک کیا جائے گا۔
اسد عمر کا کہنا تھا کہ اس ویکسین سے لگ بھگ 30 لاکھ خوراکیں تیار کی جا سکیں گی۔