پاکستان میں کرونا سے مزید 81 اموات
پاکستان میں کرونا وائرس کی تیسری لہر میں شدت آ رہی ہے۔ ملک میں گزشتہ 24 گھنٹوں میں پانچ ہزار 20 کیسز اور 81 ہلاکتیں رپورٹ ہوئی ہیں۔
سرکاری اعداد و شمار کے مطابق گزشتہ 24 گھنٹوں میں ملک میں 55 ہزار 605 افراد کے کرونا ٹیسٹ کیے گئے جن میں مثبت کیسز کی شرح 9.02 فی صد رہی۔
ملک میں کرونا کیسز کی مجموعی تعداد چھ لاکھ 87 ہزار 908 ہوگئی ہے جب کہ 14 ہزار 778 افراد انتقال کر چکے ہیں۔
پاکستان میں کرونا کے تین ہزار 568 مریض انتہائی نگہداشت وارڈز میں زیرِ علاج ہیں۔
بھارت میں کرونا کے 93 ہزار سے زائد یومیہ کیس
بھارت میں کرونا وائرس کے کیسز میں اضافہ ہو رہا ہے۔ گزشتہ 24 گھنٹوں میں ملک میں 93 ہزار 249 کیسز سامنے آئے ہیں۔ یہ تعداد امریکہ اور برازیل میں رپورٹ ہونے والے یومیہ کیسز سے بھی زیادہ ہے۔
بھارت کی وزارتِ صحت کے مطابق اتوار کو بھارت میں کرونا کیسز کی مجموعی تعداد ایک کروڑ 24 لاکھ 85 ہزار 509 تک پہنچ گئی ہے۔
بھارتی ذرائع ابلاغ کے مطابق اتوار کو کرونا وائرس کے کیسز چھ ماہ بعد ایک روز میں ریکارڈ ہونے والے سب سے زیادہ کیسز ہیں۔
ملک میں اتوار کو 513 ہلاکتیں بھی ہوئی ہیں جس کے بعد ہلاکتوں کی مجموعی تعداد ایک لاکھ 64 ہزار 623 ہو گئی ہے۔
بھارتی کشمیر میں کیسز میں اضافے کے پیشِ نظر اسکول ایک بار پھر بند
بھارت کے زیرِ انتظام کشمیر کے حکام نے کرونا وائرس کے بڑھتے ہوئے کیسز کے پیشِ نظر تعلیمی اداروں کو ایک بار پھر بند کر دیا ہے۔
بھارتی کشمیر کے لیفٹننٹ گورنر منوج سنہا کے دفتر کی جانب سے اتوار کو جاری کیے گئے ایک بیان کے مطابق نوین جماعت تک دو ہفتے تک جب دسویں سے بارہویں جماعت تک کے لیے اسکولز ایک ہفتے کے لیے بند کیے گئے ہیں۔
واضح رہے گزشتہ دنوں وادی کشمیر میں مختلف تعلیمی اداروں کے 100 سے زائد طلبہ اور 24 کے لگ بھگ اساتذہ اور انتظامی عملے کے افراد کرونا کا شکار ہو گئے تھے۔
اتوار کو حکومت نے یہ اعلان بھی کیا کہ ہر قسم کی سماجی اور دیگر تقریبات میں زیادہ سے زیادہ دو سو افراد کو ایس او پیز کے تحت شریک ہونے کی اجازت ہو گی۔
گزشتہ ایک ہفتے کے دوران بھارت کے زیرِ انتظام کشمیر میں تین ہزار سے زائد کیس رپورٹ ہوئے ہیں جب کہ اس مہلک وائرس سے اسی عرصے کے دوران 20 افراد ہلاک ہوئے ہیں۔
بھارتی اداکار اکشے کمار بھی کرونا وائرس کا شکار
بھارت میں کرونا وائرس کی نئی لہر تیزی سے پھیل رہی ہے۔ اب تک کئی معروف شخصیات وائرس سے متاثر ہوچکی ہیں جس میں حالیہ اضافہ بالی وڈ اسٹار اکشے کمار کا ہے۔
بالی وڈ اداکار اکشے کمار نے ایک ٹوئٹ میں کرونا وائرس سے متاثر ہونے کی تصدیق کی ہے۔
ترپن سالہ اداکار نے اتوار کی صبح کی گئی اپنی ٹوئٹ میں کہا کہ ان کا کووڈ-19 کا ٹیسٹ مثبت آیا ہے۔
انہوں نے بتایا کہ وائرس کی تصدیق کے بعد اُنہوں نے خود کو الگ کر لیا ہے اور وہ اپنی ضروری دیکھ بھال کر رہے ہیں۔
بالی وڈ اسٹار نے ان تمام افراد سے کرونا ٹیسٹ کرانے کی درخواست بھی کی جو ان سے رابطے میں تھے۔
اکشے کمار کا شمار بھارت کے صفِ اول کے اداکاروں میں ہوتا ہے۔ وہ ایکشن، کامیڈی، رومانس سمیت مختلف موضوعات پر بننے والی درجنوں فلموں میں کام کر چکے ہیں۔
بالی وڈ اسٹار سے قبل ہفتے کو بھارتی کرکٹ ٹیم میں شامل اسپنر اکسر پٹیل نے بھی بتایا تھا کہ ان کا کرونا ٹیسٹ مثبت آیا ہے۔
ایک ہفتے قبل سابقہ بھارتی بلے باز سچن ٹنڈولکر میں بھی کرونا وائرس کی تشخیص ہوئی تھی۔