پاکستان میں بین الصوبائی ٹرانسپورٹ ہفتے میں دو روز بند رکھنے کا فیصلہ
پاکستان میں کرونا وائرس کی صورتِ حال کی نگرانی کرنے والے ادارے نیشنل کمانڈ اینڈ آپریشن سینٹر (این سی او سی) نے ہفتے میں دو روز کے لیے بین الصوبائی ٹرانسپورٹ بند کرنے کا فیصلہ کیا ہے۔
'این سی او سی' کے جاری کردہ ایک اعلامیے کے مطابق 10 سے 25 اپریل تک ہفتے میں دو روز (ہفتہ اور اتوار) بین الصوبائی ٹرانسپورٹ بند رہے گی۔ تاہم مال بردار گاڑیوں، طبی سامان اور دیگر ایمرجنسی سروسز کی اجازت ہو گی۔
ریلوے آپریشن ہفتے میں معمول کے مطابق بحال رہیں گے تاہم مسافروں کی گنجائش 70 فی صد تک کر دی گئی ہے۔
این سی او سی کے مطابق پابندی پر 20 اپریل کو دوبارہ جائزہ لیا جائے گا۔
اسکول کھولنے یا مزید بند رکھنے کا فیصلہ منگل کو ہو گا
وفاقی وزیر تعلیم شفقت محمود نے کہا ہے کہ صحت اور تعلیم کے شعبوں کے وزرائے اعلیٰ کا اجلاس منگل کو ہو گا جس کے دوران اسکول کھولنے یا مزید بند رکھنے سے متعلق فیصلہ کیا جائے گا۔
شفقت محمود کے مطابق این سی او سی کے اجلاس میں امتحانات کی صورتِ پر بھی بات چیت ہو گی۔
بھارت: ریاست مہاراشٹرا میں رات کا کرفیو نافذ
بھارت کی ریاست مہاراشٹرا میں کیسز میں اضافے کے بعد رات کا کرفیو نافذ کر دیا گیا ہے۔
حکام کے مطابق کرونا وبا پر قابو پانے کے لیے ریاست بھر میں رات آٹھ بجے سے صبح سات بجے تک کرفیو نافذ رہے گا جب کہ پانچ یا اس سے زائد افراد کے جمع ہونے پر پابندی ہو گی۔
حکام کا کہنا ہے کہ ریاست میں شاپنگ مالز، ریستوران اور بارز بند رہیں گے تاہم اشیائے ضروریہ کی ہوم ڈلیوری کی اجازت ہو گی۔
حکام کا کہنا ہے کہ انڈسٹریل آپریشن اور تعمیراتی کام کی اجازت ہو گی لیکن تھیٹرز بند رہیں گے۔
چین: شمالی شہر رلی میں کیسز بڑھنے لگے
میانمار سے متصل چین کے شہر رلی میں کرونا کیسز میں مسلسل اضافہ ہو رہا ہے اور کیسز کی تعداد بڑھ کو 100 سے زیادہ ہو گئی ہے۔
حکام نے وبا پر قابو پانے کے لیے شہر کے تمام تین لاکھ شہریوں کو ویکسین لگانے کی جمعے سے شروع ہونے والی مہم کو مزید تیز کر دیا ہے۔
نیشنل ہیلتھ کمیشن کے مطابق پیر کو مزید 20 افراد میں وائرس کی تشخیص ہوئی ہے۔
رلی شہر میں ان افراد کو اسپتالوں میں داخل کر دیا گیا ہے جن کے کیسز مثبت آئے تھے جب کہ وہ لوگ جن میں کرونا کی صرف علامات پائی گئی تھیں انہیں آئسولیٹ کر دیا گیا ہے۔