کرونا ویکسین کی تقسیم میں عدم مساوات کو دور کریں، گریٹا تھنبرگ
ماحول کے تحفظ کے لیے کام کرنے والی سوئیڈن کی نوجوان کارکن گریٹا تھنبرگ نے کہا ہے کہ دنیا کے ملک، حکومتیں اور ویکسین بنانے والے ادارے کرونا وائرس کے مقابلے کے لیے بنائی گئی ویکسین کی تقسیم میں عدم مساوات کو دور کرنے کی کوششیں تیز کریں، کیوں کہ زیادہ تر ویکسین دنیا کے امیر ترین ممالک نے حاصل کر لی ہے جب کہ غریب ملکوں کو ویکسین کی دستیابی میں مشکلات کا سامنا ہے۔
خبر رساں ادارے 'ایسوسی ایٹڈ پریس' کے مطابق ان کا یہ بیان ایسے وقت میں سامنے آیا ہے جب ورلڈ ہیلتھ آرگنائزیشن نے اعلان کیا ہے کہ گزشتہ ہفتے دنیا بھر میں کرونا وائرس کے پانچ اعشاریہ دو ملین نئے کیسز سامنے آ چکے ہیں۔
اقوامِ متحدہ کے ادارہ برائے صحت کے مطابق یہ کسی بھی ایک ہفتے میں کرونا وائرس کے سامنے آنے والے کیسز کی سب سے بڑی تعداد ہے۔
ماحول کی تبدیلی کے لیے 'فرائی ڈیز فار فیوچر' کے نام سے بنائی گئی غیر سرکاری فاؤنڈیشن کی جانب سے گریٹا تھنبرگ نے ڈبلیو ایچ او کو ایک لاکھ یورو یعنی ایک لاکھ بیس ہزار ڈالر کی رقم عطیہ کی ہے تا کہ وہ کرونا وائرس کی ویکسین خرید کر ان ممالک کو بھجوائے جہاں اس کی سب سے زیادہ ضرورت ہے۔
بھارت: کرونا سے اموات، قبرستانوں میں جگہ کم پڑنے لگی
بھارت کے دارالحکومت نئی دہلی میں کرونا وائرس سے ہلاک ہونے والے افراد کے لیے قبرستان مختص کیا گیا تھا۔ البتہ وبا سے اموات زیادہ ہونے کے باعث یہاں جگہ کم پڑنے لگی ہے۔ جب کہ ملک میں اموات کی شرح میں مسلسل اضافہ ہو رہا ہے۔ جب کہ یومیہ کیسز بھی زیادہ تعداد میں رپورٹ ہو رہے ہیں۔
بھارت: کرونا سے اموات، قبرستانوں میں جگہ کم پڑنے لگی
پاکستان میں مزید 137 اموات
پاکستان میں گزشتہ چوبیس گھنٹوں کے دوران کرونا وائرس کے شکار مزید 137 مریض دم توڑ گئے ہیں جب کہ 5445 افراد میں وائرس کی تشخیص ہوئی ہے۔
نیشنل کمانڈ اینڈ آپریشن سینٹر کے مطابق گزشتہ چوبیس گھںٹوں میں 68 ہزار دو افراد کا کرونا ٹیسٹ کیا گیا جن میں مثبت کیسز کی شرح آٹھ فی صد رہی۔
بھارت: 18 سال سے زائد عمر کے تمام افراد کو کرونا ویکسین لگانے کا اعلان
بھارت کی حکومت نے یکم مئی سے 18 سال سے زائد عمر کے تمام تر افراد کو کرونا وائرس کی ویکسین لگانے کا اعلان کیا ہے۔
بھارتی حکومت کی جانب سے پیر کو کیا جانے والا یہ اعلان کرونا وائرس کے کیسز میں تیزی سے اضافے کے سبب کیا گیا ہے۔
وزیرِ اعظم نریندر مودی کی حکومت کو کرونا وائرس کی دوسری لہر سے نمٹنے کی حکمتِ عملی پر شدید تنقید کا سامنا ہے۔
حکومت کی جانب سے کہا گیا ہے کہ ویکسین بنانے والوں کو 50 فی صد خوراکیں وفاقی حکومت اور باقی ریاستی حکومت اور اوپن مارکیٹ کو پہلے سے اعلان شدہ قیمت پر فراہم کرنا ہو گی۔
یاد رہے کہ کرونا کیسز کے پھیلاؤ کو روکنے کے لیے بھارت کے دارالحکومت نئی دہلی، مہاراشٹرا اور گجرات سمیت 13 ریاستوں میں کرفیو، لاک ڈاؤن اور دیگر پابندیاں نافذ ہیں۔