پاکستان: نیا سفری ہدایت نامہ جاری
پاکستان کی سول ایوی ایشن اتھارٹی نے نیا سفری ہدایت نامہ جاری کر دیا ہے جس کے مطابق کیٹیگری سی میں شامل ممالک کی تعداد میں اضافے کے ساتھ سفری پابندیوں کی مدت میں 24 اپریل تک توسیع کر دی ہے۔
سول ایوی ایشن نے 23 ممالک کو 'سی' کیٹیگری میں رکھا ہے جہاں سے آنے والے مسافروں کی پاکستان آمد این او سی سے مشروط کی گئی ہے۔
کیٹیگری 'سی' میں بھارت کو بھی شامل کر لیا گیا ہے جب کہ اس درجے میں جنوبی افریقہ، بزایل، زمبابوے، بھارت، کینیا، تنزانیہ، روانڈا، موزمبیک سمیت 23 ممالک شامل ہیں۔ این او سی کے بغیر مذکورہ ملکوں سے مسافروں کی پاکستان آمد پر مکمل پابندی برقرار رہے گی۔
ان ممالک میں موجود پاکستانی پاسپورٹ، نائیکوپ اور پی او سی کارڈ ہولڈرز پاکستانی بھی وطن واپس نہیں آسکیں گے۔
سول ایوی ایشن اتھارٹی نے کیٹیگری 'اے' کے ممالک کی تعداد 20 کر دی ہے جن میں آسٹریلیا، چین، جاپان، سعودی عرب، سنگاپور، سری لنکا اور بھوٹان بھی شامل ہیں۔ ان ممالک سے آنے والے مسافروں پر کرونا ٹیسٹ کی شرط لاگو نہیں ہوتی۔
کیٹیگری 'بی' میں شامل ملکوں سے آنے والے مسافروں کے لیے پی سی آر ٹیسٹ کا دورانیہ 72 گھنٹے ہو گا۔
پشاور: کرونا کے شکار ڈاکٹر اور نرس ہلاک
پاکستان کے شہر پشاور میں کرونا وائرس کے شکار ایک اور ڈاکٹر اور نرس دم توڑ گئے ہیں۔
کرونا سے ہلاک ہونے والے ڈاکٹر خیر محمد برکی گزشتہ کئی روز سے پشاور کے نجی اسپتال کے آئی سی یو میں زیرِ علاج تھے۔
ڈاکٹر برکی لیڈی ریڈنگ اسپتال اور ڈسٹرکٹ ہیڈ کوارٹر اسپتال ٹانک کے ایم ایس رہ چکے ہیں جن کی ہلاکت کے بعد خیبر پختونخوا میں کرونا سے ہلاک ہونے والے ڈاکٹروں کی کل تعداد 61 ہو گئی ہے۔
پشاور کے حیات آباد میڈیکل کمپلیکس کی سینئر نرس نازیہ بھی چل بسی ہیں جو اسی اسپتال میں گزشتہ کئی روز سے وینٹی لیٹر پر تھیں۔
فائزر، موڈرنا، اسپوتنک ویکسینز اب لگوائیں نہیں بلکہ کھائیں!
دنیا بھر میں کرونا وائرس سے بچاؤ کی ویکسین لگوانے کے عمل کی حوصلہ افزائی کے لیے کہیں ڈونٹ تو کہیں ڈسکاؤنٹ کوپنز تقسیم کیے جا رہے ہیں لیکن ہنگری میں ایک پیسٹری کی دکان ایسی بھی ہے جہاں کرونا وائرس کی تھیم پر مبنی سوئٹ 'موس' (جیلی اور مختلف چیزوں کی تہہ والی میٹھی ڈش) پیش کی گئی ہے۔
ہنگری کے دارالحکومت بڈاپیسٹ کے شمال مشرقی علاقے ویراسجہاز سے تعلق رکھنے والی سُلیان فیملی کرونا وائرس کی ویکسین لگوانے کے خوف کو کم کرنے کی کوشش میں پیش پیش ہے۔
سلیان فیملی رنگ برنگی جیلی اور دیگر لوازمات کے ساتھ سرنج سے سجے چھوٹے چھوٹے گلاس میں 'موس' پیش کر رہی ہے۔
بھارت: کانگریس رہنما راہول گاندھی میں کرونا وائرس کی تصدیق
بھارت میں حزبِ اختلاف کی جماعت انڈین نیشنل کانگریس کے رہنما راہول گاندھی بھی کرونا وائرس کا شکار ہو گئے ہیں۔
راہول گاندھی نے منگل کو اپنے ٹوئٹر پیغام میں بتایا کہ کرونا کی بعض علامات کے بعد اُنہوں نے کرونا ٹیسٹ کرایا جو مثبت آیا ہے۔
راہول گاندھی کا کہنا تھا کہ گزشتہ چند روز کے دوران جو بھی اُن سے رابطے میں رہا ہے وہ احتیاطی تدابیر اختیار کرے۔
خیال رہے کہ بھارت میں کرونا وائرس کی دوسری لہر میں شدت آ رہی ہے اور منگل کو مزید ڈھائی لاکھ سے زائد کیس رپورٹ ہوئے ہیں۔
راہول گاندھی نے وائرس کے پھیلاؤ کے پیشِ نظر مغربی بنگال کی اپنی تمام ریلیاں بھی منسوخ کر دی تھیں۔ مغربی بنگال کی وزیر اعلیٰ ممتا بنرجی نے بھی کلکتہ میں مزید ریلیاں نہ کرنے کا اعلان کیا تھا۔