بھارت: لگ بھگ تین لاکھ ریکارڈ کرونا کیسز، دو ہزار سے زائد اموات
بھارت میں گزشتہ چوبیس گھنٹوں کے دوران دو لاکھ 95 ہزار 41 افراد میں کرونا وائرس کی تشخیص ہوئی ہے جب کہ وبا کے شکار مزید 2023 مریض دم توڑ گئے ہیں۔
بھارت میں مسلسل ساتویں روز دو لاکھ سے زیادہ کیسز رپورٹ ہوئے ہیں۔ گزشتہ چوبیس گھنٹوں میں رپورٹ ہونے والے کیسز کی یہ ریکارڈ تعداد ہے۔
عالمی وبا سے بھارت میں اب تک ایک لاکھ 82 ہزار 553 اموات اور ایک کروڑ 56 لاکھ سے زیادہ کیسز رپورٹ ہو چکے ہیں جب کہ ملک میں ایکٹو کیسز کی تعداد 20 لاکھ سے زیادہ ہے۔
وزیرِ اعظم نریندر مودی نے منگل کی شب قوم سے اپنے خطاب میں کہا ہے کہ ان کی کوشش ہے کہ ملک کو لاک ڈاؤن کی مشکلات سے بچایا جائے لیکن ریاستوں کے گورنرز آخری کوشش کی صورت میں لاک ڈاؤن کا سہارا لے سکتے ہیں۔
پاکستان میں پانچ ہزار سے زیادہ کیسز، 148 اموات
پاکستان میں گزشتہ 24 گھنٹوں کے دوران کرونا وائرس کے شکار مزید 148 مریض دم توڑ گئے ہیں جب کہ 5499 افراد میں وائرس کی تشخیص ہوئی ہے۔
سرکاری اعداد و شمار کے مطابق گزشتہ چوبیس گھنٹوں میں 47 ہزار 301 کیسز رپورٹ ہوئے ہیں جن میں مثبت کیسز کی شرح گیارہ اعشاریہ چھ دو فی صد تھی۔
پاکستان میں ایکٹو کیسز کی تعداد 83 ہزار سے تجاوز کر گئی ہے۔
پاکستان میں جمعے سے نئی پابندیوں کا عندیہ
پاکستان کے وفاقی وزیر برائے منصوبہ بندی اسد عمر نے کہا ہے کہ نیشنل کمانڈ اینڈ آپریشن سینٹر نے کچھ نئے فیصلے کیے ہیں جس کے مطابق جمعے سے ملک میں نئی بندشوں کا آغاز کریں گے۔
اسلام آباد میں پریس کانفرنس کے دوران اسد عمر نے کہا کہ حکومتی کوششوں کے نتیجے میں کرونا کے پھیلاؤ کو قدرے کم کیا ہے لیکن رواں ہفتے کیسز اور اموات کی شرح میں اضافہ ہوا ہے جب کہ اسپتالوں میں مثبت کیسز کی وجہ سے دباؤ بھی بڑھا ہے۔
انہوں نے کہا کہ کرونا کیسز میں اضافے کی وجہ سے بڑے بڑے شہر بند کرنا پڑیں گے تاہم ابھی بڑے شہر بند نہیں کر رہے لیکن چند دن کی گنجائش باقی رہ گئی ہے۔
اسد عمر کے مطابق کراچی میں کیسز کی شرح 13 اور حیدر آباد میں 14 فی صد ہے۔ وفاقی حکومت صوبوں کی مدد کے لیے تیار ہے۔
وفاقی وزیر منصوبہ بندی نے عندیہ دیا کہ اگر وبا کے پھیلاؤ کو نہ روکا تو بڑے شہر بند کرنے کے سوا کوئی راستہ نہیں ہو گا۔
بھارت: ریاست مہاراشٹرا میں ایک اسپتال میں آکسیجن لیک، 22 کرونا مریض ہلاک
بھارت میں کرونا بحران کے دوران اس وقت ایک بڑا حادثہ پیش آیا جب ریاست مہاراشٹرا کے شہر ناسک میں ایک اسپتال کے باہر آکسیجن ٹینکر کے لیک ہونے سے کرونا وائرس کے 22 مریض آکسیجن کی عدم دستیابی سے ہلاک ہو گئے۔
کلکٹر سورج مندھارے نے بھارت کے نشریاتی ادارے ’این ڈی ٹی وی‘ کو بتایا کہ ناسک میں ذاکر حسین میونسپل اسپتال میں یہ حادثہ پیش آیا ہے۔ حادثے کے وقت اسپتال میں 171 مریض تھے اور 31 مریضوں کو آکسیجن کی ضرورت تھی۔
ناسک میونسپل کارپوریشن کے کمشنر کیلاش جادھو نے میڈیا سے بات کرتے ہوئے کہا کہ ٹینکر لیک ہونے کی وجہ سے نصف گھنٹے تک آکسیجن کی سپلائی بند رہی جس کی وجہ سے وینٹی لیٹرز پر موجود مریضوں کی اموات ہوئیں۔