بھارت میں کرونا مریضوں کی تعداد سوا دو کروڑ سے متجاوز
بھارت میں کرونا وائرس کے مزید تین لاکھ 66 ہزار سے زائد کیسز اور تین ہزار 700 سے زیادہ اموات ریکارڈ کی گئی ہیں۔
بھارت کی وزارتِ صحت کے مطابق ملک میں پیر کو کرونا وائرس کے مجموعی کیسز تین لاکھ 66 ہزار 161 کے اضافے سے دو کروڑ 26 لاکھ 62 ہزار 575 تک پہنچ گئے ہیں۔
ملک میں گزشتہ 24 گھنٹوں میں تین ہزار 754 ہلاکتیں بھی ہوئی ہیں جس کے بعد مجموعی تعداد دو لاکھ 46 ہزار 116 ہوگئی ہے۔
بھارت میں کووڈ 19 کے کیسز میں اضافے کے ساتھ ہی ویکسی نیشن کا عمل بھی تیزی سے جاری ہے اور اب تک سترہ کروڑ سے زیادہ افراد کی ویکسی نیشن کی جا چکی ہے۔
پاکستان میں مثبت کیسز کی شرح 9 فی صد سے زیادہ
پاکستان میں کرونا وائرس کی تیسری لہر جاری ہے اور گزشتہ 24 گھنٹوں میں مزید تین ہزار 447 افراد میں وائرس کی تشخیص ہوئی ہے۔
سرکاری اعداد و شمار کے مطابق ملک میں 24 گھنٹوں کے دوران 37 ہزار 756 افراد کے کرونا ٹیسٹ کیے گئے جس میں مثبت کیسز کی شرح 9.12 فی صد رہی۔ اس طرح مجموعی کیسز کی تعداد آٹھ لاکھ 61 ہزار 473 ہوگئی۔
ملک میں وائرس سے متاثرہ 78 مریض انتقال بھی کر گئے جس کے بعد ہلاکتوں کی مجموعی تعداد 18 ہزار 993 تک پہنچ گئی۔
کرونا وائرس کے فعال کیسز کی تعداد 80 ہزار 375 ہے جن میں سے چار ہزار 846 نگہداشت کی حالت میں ہیں۔
واضح رہے کہ ملک میں کرونا کے پھیلاؤ کو روکنے کے لیے حکومت نے عید تک سخت پابندیاں عائد کردی گئی ہیں اور لوگوں کو گھروں میں رہنے کی تاکید کی ہے۔
کراچی ایکسپو سینٹر ویکسی نیشن سینٹر میں تبدیل
پاکستان کے سب سے بڑے شہر کراچی کے ایکسپو سینٹر کو ویکسی نیشن سینٹر میں تبدیل کردیا گیا ہے۔
محکمۂ صحت سندھ کے ایک ٹوئٹ کے مطابق صوبائی وزیرِ صحت ڈاکٹر عذرا فضل پیچوہو نے پاکستان کے سب سے بڑے ویکسی نیشن سینٹر کا افتتاح کیا۔
ان کے بقول ایکسپو سینٹر میں یومیہ 25 سے 30 ہزار ویکسی نیشن کی جاسکتی ہیں اور یہاں تربیت یافتہ عملہ 24 گھنٹے موجود ہے۔
'سولہ مئی سے تمام افراد کے لیے ویکسی نیشن شروع کردی جائے گی'
سندھ کی وزیرِ صحت ڈاکٹر عذرا فضل پیچوہو نے کہا ہے کہ 16 مئی سے تمام افراد کے لیے ویکسی نیشن شروع کردی جائے گی اور اب 40 سال سے کم عمر افراد بھی ویکسین لگوا سکیں گے۔
کراچی میں ایکسپو سینٹر میں ماس ویکسی نیشن سینٹر کے افتتاح کے موقع پر انہوں نے کہا کہ لوگوں کی طرف سے ایس او پیز پر عمل نہیں کیا جا رہا جس کی وجہ سے کرونا کے پھیلاؤ کا امکان زیادہ ہے۔
انہوں نے کہا کہ ہم چاہتے ہیں کہ ویکسین فوری دستیاب ہو تاکہ زیادہ لوگوں کو ویکسین لگائی جا سکے۔
صوبائی وزیر کے مطابق سندھ میں کوویکس، ایسٹرازینیکا، سائنو فارم اور کین سائنو ویکسین لگائی جائیں گی۔
ڈاکٹر عذرا کے مطابق اگر ویکسین رجسٹریشن میں کسی کو کوئی مسائل کا سامنا ہے تو وہ ویکسی نیشن سینٹر آئے اس کی رجسٹریشن کرکے ویکسین لگا دی جائے گی۔