وفاقی وزیرِ تعلیم شفقت محمود کرونا وائرس سے متاثر
پاکستان کے وفاقی وزیرِ تعلیم شفقت محمود کرونا وائرس سے متاثر ہوگئے ہیں۔
انہوں نے ٹوئٹر پر ٹوئٹ کیا کہ ان کا کرونا وائرس کا ٹیسٹ مثبت آگیا ہے۔ ان کے بقول انہیں معمولی علامات ہیں لیکن وہ ٹھیک ہیں۔
جاپان میں وبا کے پھیلاؤ میں تیزی
جاپان کا دوسرا سب سے بڑا شہر اوساکا ان دنوں کرونا کی ایک نئی اور بڑی لہر کی لپیٹ میں ہے جس سے اسپتالوں میں دستیاب بستر اور وینٹی لیٹر کم پڑتے جا رہے ہیں۔ ڈاکٹروں کا کہنا ہے کہ اگر یہ صورت حال برقرار رہی تو صحت کا نظام اس بوجھ کو مزید نہیں سہار سکے گا۔
جاپان میں طبی ماہرین نے انتباہ کیا ہے کہ اگر ٹوکیو میں اولمپکس کرائے گئے تو کرونا وائرس کے پھیلاؤ میں مزید اضافہ ہو سکتا ہے۔
جاپان کے اس مغربی علاقے کی آبادی تقریباً 90 لاکھ ہے اور ان دنوں اس علاقے کو کرونا وائرس کی چوتھی لہر کا سامنا کرنا پڑ رہا ہے۔ اور ملک میں اس وبا سے ہونے والی ہلاکتوں کے ایک تہائی کا تعلق اسی خطے سے ہے۔
اوساکا میں قائم کائنڈے یونیورسٹی اسپتال کے ڈائریکٹر یوجی توہدا کہتے ہیں کہ کرونا کی تیز رفتاری سے پھیلنے والی برطانوی قسم اور اس سے مقابلے میں لاپروائی کی وجہ سے اس کے پھیلاؤ اور مریضوں کی تعداد میں اضافہ ہو گا۔
ویکسین لگوانے والے ماسک کے بغیر عوامی مقامات پر نکل سکیں گے؟
امریکہ میں امراض کی روک تھام کے ادارے 'سینٹرز فار ڈیزیز کنٹرول اینڈ پری وینشن' نے کہا ہے کہ وہ لوگ جنہیں کرونا ویکسین کی دونوں خوراکیں لگ چکی ہیں، وہ ماسک کے بغیر گھروں سے باہر نکل سکتے ہیں۔ کیا اس اعلان کے بعد لوگ بلا خوف ماسک اتار کر گھوم پھر سکیں گے؟ سعدیہ زیب کی رپورٹ دیکھیے۔
پاکستان: 19 سال اور اس سے زائد عمر کے افراد کی ویکسین رجسٹریشن کا فیصلہ
نیشنل کمانڈ اینڈ آپریشن سینٹر (این سی او سی) کے سربراہ اسد عمر نے کہا ہے کہ ملک بھر میں 19 سال اور اس سے زائد عمر کے افراد کی کرونا ویکسین کے لیے رجسٹریشن کا عمل شروع کرنے کا فیصلہ کیا گیا ہے۔
اسد عمر کے مطابق یہ فیصلہ این سی او سی کے اجلاس میں کیا گیا جس کے بعد طبی ماہرین کی جانب سے منظور کردہ ملک کی تمام آبادی کے لیے رجسٹریشن شروع ہو جائے گی۔