شفقت محمود صحت یاب ہو گئے
پاکستان کے وفاقی وزیرِ تعلیم شفقت محمود نے کہا ہے کہ وہ کرونا وائرس سے مکمل صحت یاب ہو گئے ہیں۔
اپنے ایک ٹوئٹ میں انہوں نے بتایا کہ ان کے دو کرونا ٹیسٹ منفی آئے ہیں جس کے بعد وہ دوبارہ اپنا کام شروع کر رہے ہیں۔
بھارتی کشمیر میں 'کرونا کرفیو' میں نرمی
بھارت کے زیرِ انتظام کشمیر میں کرونا وائرس کا پھیلاؤ روکنے کے لیے گزشتہ ایک ماہ سے نافذ 'کرونا کرفیو' میں نرمی کردی گئی ہے۔ کرفیو میں کی جانے والی نرمی کے بعد جموں و کشمیر کے 20 اضلاع میں دکانیں اور مخصوص کاروباری ادارے متبادل دن کاروبار کرنے کے اصول کی بنیاد پر کھول دیے گئے ہیں۔
بھارتی کشمیر میں ’کرونا کرفیو‘ میں نرمی
پاکستان: مزید 1800 سے زیادہ افراد کرونا سے متاثر
پاکستان میں گزشتہ 24 گھنٹوں کے دوران کرونا وائرس کے 1843 کیسز رپورٹ ہوئے ہیں جب کہ وبا کے شکار مزید 80 مریض دم توڑ گئے ہیں۔
سرکاری اعداد و شمار کے مطابق گزشتہ چوبیس گھنٹوں میں 47 ہزار 183 افراد کے کرونا ٹیسٹ کیے گئے اور مثبت کیسز کی شرح تین اعشاریہ نو فی صد رہی۔
امریکہ کرونا وائرس کے ماخذ کی تلاش کے معاملے پر سیاست کر رہا ہے: چین
چین نے کرونا وائرس کی ابتدا سے متعلق الزامات کو مسترد کرتے ہوئے اپنے ردِ عمل میں کہا ہے کہ امریکہ اس معاملے پر سیاست کر رہا ہے۔
اس سے قبل امریکہ نے کہا تھا کہ وہ کرونا وائرس کی شروعات سے متعلق اپنی انٹیلی جنس ایجنسیوں کی باریک بینی سے کی جانے والی تحقیق کے نتائج عوام کے سامنے پیش کرے گا۔
چین کی وزارتِ خارجہ کے ترجمان وانگ وین بن نے کہا ہے کہ امریکہ کی طرف سے تواتر کے ساتھ اس طرح کے سوالات اٹھائے جانے کا مقصد صرف اپنے ملک میں وبا پر قابو پانے میں ناکامی سے توجہ ہٹانا اور چین پر دباؤ ڈالنے کے لیے اس پر الزام لگانا ہے۔
وانگ کا کہنا تھا کہ اس معاملے پر سیاست سے امریکہ اور اس کے عوام کو نقصان پہنچے گا اور وبا کے ماخذ کو تلاش کرنے کے لیے بین الاقوامی تعاون کی راہ میں رکاوٹیں کھڑی ہوں گی، جس کا نتیجہ صرف ناکامی کی صورت میں نکلے گا۔