امریکہ سے 25 لاکھ موڈرنا ویکسین کی خوارکیں پاکستان پہنچ گئیں
امریکہ کی پاکستان کو فراہم کردہ موڈرنا ویکسین کی 25 لاکھ خوراکیں اسلام آباد پہنچ گئیں۔
امریکہ کے پاکستان میں موجود سفارت خانے کے جاری کردہ بیان کے مطابق یہ ویکسین پاکستان کے لوگوں کو ویکسین کی ترسیل کے بین الاقوامی اتحاد ’کوویکس‘، یونیسف اور حکومتِ پاکستان کے اشتراک سے فراہم کی گئی ہے۔
بیان میں کہا گیا ہے کہ یہ عطیہ امریکہ کی جانب سے دنیا بھر میں ویکسین کی آٹھ کروڑ خوراکیں تقسیم کرنے کی کوششوں کا حصہ ہے۔
امریکہ کے سفارت خانے کی ناظم الامور اینجیلا پی ایگلر نے کہا ہے کہ اس ویکسین کے استعمال سے پاکستان میں انسانی جانوں کے تحفظ اور اس بحران سے نکلنے میں مدد میسر ہو گی۔
ویکسین کی اس کھیپ کے علاوہ امریکہ نے پاکستان کو وبا میں مدد کے لیے پانچ کروڑ ڈالر بھی دیے ہیں۔
پاکستان میں مزید 34 افراد ہلاک
پاکستان میں کرونا وائرس سے مزید 34 افراد ہلاک ہوئے ہیں۔
سرکاری اعداد و شمار کے مطابق ملک بھر میں گزشتہ 24 گھنٹوں کے دوران کرونا وائرس سے مزید 1400 افراد متاثر ہوئے ہیں جب کہ 48 ہزار سے زائد ٹیسٹ کیے گئے۔
پاکستان میں ٹیسٹ مثبت آنے کی شرح 2.91 فی صد رہی۔
اعداد و شمار کے مطابق ملک بھر میں مزید 34 اموات کے بعد مجموعی طور پر ہلاک ہونے والے افراد کی تعداد 22 ہزار 379 ہو گئی ہے۔
بھارت کی کمپنی کا وبا کے خلاف 93 فی صد مؤثر ویکسین بنانے کا دعویٰ
بھارت کی بائیو ٹیکنالوجی کمپنی ‘بھارت بائیو ٹیک’ نے دعویٰ کیا ہے کہ ان کی بنائی ہوئی ‘کو ویکسین’ فیز تھری ٹرائلز میں کرونا وبا کی شدید علامات کے خلاف 93.4 فی صد کار آمد ثابت ہوئی ہے۔
کمپنی کی جانب سے جاری کردہ اعداد و شمار کے مطابق کوویکسین کرونا وائرس کی قسم ڈیلٹا کے خلاف بھی 65.2 فی صد افادیت رکھتی ہے۔
بھارت میں سامنے آنے والی وبا کی ڈیلٹا قسم کے سبب رواں سال اپریل اور مئی میں کرونا کیسز میں اضافہ ہوا تھا۔
بھارت میں تیار کردہ کرونا ویکسین کرونا علامات کے خلاف 77.8 فی صد افادیت رکھنے کا بھی دعویٰ کیا جا رہا ہے۔
بھارت کی بائیو ٹیک کمپنی کے مطابق وہ ویکسین کی ایک ماہ میں دو کروڑ 30 لاکھ خوراکیں بنائے گی۔
بھارت، امریکہ کے بعد دنیا بھر میں وبا سے سب سے زیادہ متاثرہ ملک ہے جہاں کرونا کیسز کی تعداد تین کروڑ سے تجاوز کر چکی ہے۔ جب کہ وبا سے اب تک چار لاکھ سے زائد افراد ہلاک ہو چکے ہیں۔