کرونا ویکسی نیشن مہم میں ٹیکنالوجی کا استعمال
کرونا وائرس سےبچاؤ کے لیے ویکسین لگانے کی مہم میں دنیا کے کئی ممالک میں ٹیکنالوجی استعمال کی جا رہی ہے۔ شہری اسمارٹ فون یا کمپیوٹر پر خود کو رجسٹر کراتے ہیں۔ البتہ بھارت جیسے ممالک کے شہری، جہاں ان کو ٹیکنالوجی تک رسائی نہیں ہے، کیا کریں؟ جانیے اس رپورٹ میں۔
سعودی عرب کا چار ممالک کا سفر کرنے والوں پر پابندی
سعودی عرب نے کرونا وبا کے پیشِ نظر متحدہ عرب امارات، افغانستان، ایتھوپیا اور ویتنام کا سفر کرنے والوں اور ان ممالک سے آنے والوں پر پابندی عائد کر دی ہے۔
سرکاری خبر رساں ادارے کے مطابق اس پابندی کا اطلاق رواں چار جولائی سے ہر اس شخص پر ہو گا جو گزشتہ 14 دن کے دوران ان چار ممالک میں تھا۔
تاہم جو سعودی شہری اتوار تک واپس آ جائیں گے، ان پر اس پابندی کا اطلاق نہیں ہو گا۔
چین کی کرونا ویکسین کی افادیت پر اٹھتے سوالات، پاکستان کیا کرے؟
دنیا کے لگ بھگ 90 ممالک میں چین کی کمپنیوں کی تیار کردہ کرونا ویکسین استعمال ہو رہی، جس کی افادیت پر سوالات بھی اٹھائے جا رہے ہیں۔ اس بارے میں نیشنل کنٹرول لیبارٹری فار بائیولوجکس کے سابق ڈائریکٹر عبد الصمد خان نے اپنے خیالات کا اظہار نیلوفر مغل سے گفتگو میں کیا ہے۔ جانیے اس ویڈیو رپورٹ میں۔
سندھ میں پابندیوں میں مزید نرمی
سندھ میں حکومت نے کرونا کیسز میں کمی کے باعث عائد کردہ پابندیوں میں نرمی کرتے ہوئے کاروباری اوقات کار رات 10 بجے تک بڑھا دیے ہیں۔
نئے احکامات کے تحت کرونا ویکسین کی دونوں خوراکیں لگوانے والوں کو ریستورانوں میں انڈور بیٹھنے کی اجازت ہو گی۔
حکومت سندھ کے انفارمیشن سیل کے مطابق ہوٹلز، ریستورانوں کیفیز کو صارفین کے درمیان تین فٹ کا فاصلہ برقرار رکھتے ہوئے رات 12 بجے تک انڈور اور آؤٹ ڈور کھانے کی اجازت ہو گی۔
انفارمیشن سیل کی ٹوئٹ کے مطابق ریستورانوں میں 50 فی صد گنجائش کے ساتھ ویکسین لگوانے والے افراد کو بٹھانے کی اجازت ہو گی۔
اس کے علاوہ ویکسین لگوانے والے افراد کے لیے سنیما اور تھیٹرز رات ایک بجے تک کھولنے کی اجازت ہو گی۔