بھارت میں کرونا سے مزید 817 اموات
بھارت میں گزشتہ چوبیس گھنٹوں کے دوران کرونا وائرس سے مزید 45 ہزار 892 افراد متاثر ہوئے ہیں۔
وزارتِ صحت کے اعداد و شمار کے مطابق ملک میں کرونا وائرس سے مزید 817 ہلاکتیں بھی ہوئی ہیں۔
بھارت میں کرونا کے مثبت کیسز کی شرح دو اعشاریہ چار دو ریکارڈ کی گئی ہے۔
ملک میں 24 گھنٹوں کے دوران 44 ہزار 291 افراد صحت یاب بھی ہوئے ہیں۔
پاکستان میں کرونا کی چوتھی لہر کا خدشہ
پاکستان کے وفاقی وزیربرائے منصوبہ بندی اسد عمر نے کہا ہے ملک میں کرونا کی چوتھی لہر شروع ہونے کے واضح آثار نظر آرہے ہیں۔
اپنے ٹوئٹ میں ان کا کہنا تھا کہ دو ہفتے قبل اپنے ایک ٹوئٹ میں بتایا تھا کہ ہمارے آرٹیفیشل انٹیلی جینس ماڈلز چوتھی لہر شروع ہونے کے امکان ظاہر کررہے ہیں۔ اب چوتھی لہر شروع ہونے کے واضح آثار نظر آرہے ہیں۔
ان کا کہنا تھا کہ کرونا سے بچاؤ کی تدابیر اور ایس او پیز پر عمل درآمد نہ ہونے اور کرونا کی دیگر اقسام بالخصوص بھارتی قسم کے پھیلاؤ کے باعث یہ صورت حال پیدا ہوئی ہے۔
پاکستان میں تیسرے روز کرونا وائرس کے 15 سو سے زائد کیسز رپورٹ
پاکستان میں مسلسل تیسرے روز کرونا وائرس کے 15 سو سے زائد کیسزرپورٹ ہوئے ہیں جب کہ ملک میں اب تک کرونا سے بچاؤ کی ویکسین کی ایک کروڑ سے زائد خوراکیں دی جاچکیں ہیں۔
نیشنل کمانڈ اینڈ آپریشن سینٹرکے مطابق جمعے کو ملک میں 1737 نئے کیسز رپورٹ ہوئے ہیں جب کہ گزشتہ چوبیس گھنٹوں کے دوران 47 ہزار 528 ٹیسٹ کیے گئے تھے اور 25 ہلاکتیں ہوئی ہیں۔
پاکستان میں کرونا وائرس کے مجموعی طور پر فعال کیسز 35 ہزار573 ہوگئے ہیں جب کہ کرونا وائرس کے کیسز مثبت آنے کی شرح 3.65فی صد ہوگئی ہے۔
جنوبی کوریا میں مسلسل تیسرے روز ریکارڈ یومیہ کیسز رپورٹ
جنوبی کوریا میں گزشتہ 24 گھنٹوں کے دوران کرونا وائرس کے ریکارڈ یومیہ کیسز رپورٹ ہوئے ہیں۔
یہ مسلسل تیسرا دن ہے کہ جب ہفتے کو ریکارڈ یومیہ کیسز سامنے آئے ہیں۔
جنوبی کوریا میں جمعے کو رات گئے ایک ہزار 378 کیسز رپورٹ کیے گئے جب کہ جمعرات کو رپورٹ کیے جانے والے کیسز کی تعداد ایک ہزار 316 تھی۔
حکام کا کہنا ہے کہ کرونا کیسز میں اضافے کے سبب آئندہ ہفتے پیر سے پہلی بار دارالحکومت سول اور اس کے ملحقہ علاقوں میں پابندیاں سخت کی جائیں گی۔
کیسز میں اضافے کے پیشِ نظر خدشات کا اظہار کیا جا رہا ہے کہ رواں ماہ جولائی کے اختتام تک کیسز کی تعداد دو گناہ ہو سکتی ہے۔
پانچ کروڑ 20 لاکھ آبادی والے ملک جنوبی کوریا میں لگ بھگ 11 فی صد افراد کو کرونا ویکسین کی دونوں خوراکیں جب کہ 30 فی صد افراد کو ویکسین کی ایک خوراک لگائی جا چکی ہے۔