ریکارڈ یومیہ ویکسی نیشن پر خوشی ہے: اسد عمر
پاکستان میں کرونا وبا پر قابو پانے کے نگراں ادارے 'این سی او سی' کے سربراہ اسد عمر نے ملک میں ایک دن کے دوران ریکارڈ 10 لاکھ سے زیادہ ویکسین لگائے جانے کا ہدف پورا ہونے پر خوشی کا اظہار کیا ہے۔
انہوں نے کہا کہ ہدف کے حصول میں تمام وفاقی ذمہ داران نے پنجاب، سندھ، خیبر پختونخو اور اسلام آباد کی انتظامیہ کے ساتھ مل کر کام کیا اور سب نے حیرت انگیز کام کیا ہے۔
جاپان: کرونا وائرس نوجوانوں میں تیزی سے پھیلنے لگا
جاپان کے وزیرِ اعظم یوشی ہی دے سوگا نے کہا ہے کہ ملک میں نوجوان طبقے میں کرونا وائرس تیزی سے پھیل رہا ہے۔
انہوں نے بتایا کہ چالیس اور پچاس سال کے افراد کے مقابلے میں 20 سے 30 سال کی عمر کے نوجوان کرونا سے تیزی سے متاثر ہو رہے ہیں۔
انہوں نے کہا کہ وہ لوگوں کی جانوں کے تحفظ کے لیے اقدامات کا تعین کر رہے ہیں۔
یاد رہے کہ جاپان اولمپکس مقابلوں کی میزبانی کر رہا ہے جہاں پہلے ہی کرونا وائرس کے پھیلنے کے خدشات کا اظہار کیا جا رہا تھا۔
اسلام آباد کے 50 فی صد شہریوں نے ویکسین لگوا لی: اسد عمر
پاکستان میں کرونا وبا پر قابو پانے کے ذمہ دار ادارے این سی او سی کے سربراہ اسد عمر نے کہا ہے کہ وفاقی دارالحکومت اسلام آباد کے 50 فی صد اہل افراد نے کرونا ویکسین کی کم از کم ایک خوراک لگوا لی ہے۔
اسد عمر کے مطابق پشاور اور راولپنڈی میں 35 فی صد، فیصل آباد، 28، لاہور، گوجرانوالہ، سیالکوٹ اور سرگودھا میں 27 فی صد شہریوں نے ویکسین لگوا لی ہے۔
ان کے بقول کراچی میں 26 فی صد اور حیدرآباد میں 25 فی صد شہری ویکسین لگوا چکے ہیں۔
امریکہ نے 60 ملکوں کو کرونا ویکسین کی 11 کروڑ خوراکیں بھیج دیں
امریکہ نے کہا ہے کہ اس نے دنیا کے 60 سے زیادہ ملکوں کے عوام کے لیے کرونا وائرس سے بچاؤ کی ویکسین کی 11 کروڑ سے زیادہ خوراکیں بھیج دی ہیں۔
منگل کے روز وائٹ ہاؤس نے اپنے ایک بیان میں اسے ایک "اہم سنگ میل" قرار دیا ہے۔
بیان میں کہا گیا ہے، "امریکہ کے پاس دنیا کو دینے کے لیے ویکسین کا ذخیرہ موجود ہے اور وہ بیرون ملک کرونا وائرس کے خلاف اسی مقصد کے تحت لڑ رہا ہے جیسے کہ وہ ملک کے اندر یہ جنگ جاری رکھے ہوئے ہے۔"
اس سے قبل صدر جو بائیڈن نےجون کے اختتام تک دنیا بھر کے ملکوں کو عالمی وبا سے بچاؤ کی ویکسین کی کم از کم 8 کروڑ خوراکیں عطیہ کرنے کا وعدہ کیا تھا۔ وائٹ ہاؤس کا کہنا ہے کہ منگل کے اس اعلان سے یہ وعدہ پورا ہو گیا ہے اور، "کووڈ-19 کی ویکسین عطیہ کرنے والے ایک عالمی لیڈر کے طور پر امریکہ کی حیثیت مسلم ہو گئی ہے۔