پاکستان میں زیرِ علاج افراد کی تعداد ساڑھے 86 ہزار ہو گئی
پاکستان میں کرونا وائرس سے متاثرہ زیرِ علاج افراد کی تعداد ساڑھے 86 ہزار ہو گئی ہے۔
سرکاری اعداد و شمار کے مطابق گزشتہ 24 گھنٹوں میں وبا سے مزید چار ہزار 786 افراد متاثر ہوئے ہیں جس کے بعد زیرِ علاج افراد کی مجموعی تعداد 86 ہزار 606 ہو گئی ہے۔
حکام کے مطابق ملک بھر میں وبا سے اب تک 10 لاکھ 94 ہزار سے زائد افراد متاثر ہو چکے ہیں جن میں سے 90 فی صد افراد صحت یاب ہو چکے ہیں جب کہ 2.2 فی صد کی موت ہوئی ہے۔
پاکستان میں وبا سے مزید 73 افراد ہلاک
پاکستان میں کرونا وائرس سے مزید 73 افراد کی موت ہوئے ہے۔
سرکاری اعداد و شمار کے مطابق گزشتہ 24 گھنٹوں میں ہونے والی اموات کے بعد مجموعی ہلاکتوں کی تعداد 24 ہزار 339 ہو گئی ہے۔
واضح رہے کہ پاکستان میں سب سے زیادہ 11 ہزار 329 اموات صوبہ پنجاب میں ہوئی ہیں جب کہ سندھ میں چھ ہزار 384، خیبر پختونخوا میں چار ہزار 640 اور بلوچستان میں 332 افراد ہلاک ہوئے ہیں۔
پاکستان کے زیرِ انتظام کشمیر میں 662 جب کہ وفاقی دارالحکومت اسلام آباد میں 830 اموات رپورٹ ہو چکی ہیں۔
ایران کا چھ روزہ ملک گیر لاک ڈاؤن لگانے کا اعلان
ایران نے کہا ہے کہ وہ کرونا وائرس کی پانچویں لہر کے باعث ملک کے تمام شہروں میں چھ دن کا لاک ڈاؤن نافذ کیا جا رہا ہے۔
لاک ڈاؤن کے دوران تمام بازار، کاروباری مراکز، سرکاری دفاتر، سینما، ورزش کے مقامات اور ہوٹل بند ہوں گے۔
لاک ڈاؤن کا آغاز پیر سے ہوگا اور یہ ہفتے تک جاری رہے گا۔
ہفتے کو ایران میں وبا سے مزید 466 افراد کی ہلاکت اور لگ بھگ 30 ہزار کیسز رپورٹ ہوئے۔
وبا سے ایران میں اب تک 97 ہزار سے زائد افراد ہلاک ہو چکے ہیں جب کہ 44 لاکھ افراد متاثر ہوئے ہیں۔
جاپان میں یومیہ کیسز میں مسلسل اضافہ
جاپان میں اولمپکس ختم ہو چکے ہیں البتہ چھٹیاں جاری ہیں ایسے میں شہری حکومت کی ہوٹلوں اور بارز سے دور رہنے کی ہدایت کو نظر انداز کر رہے ہیں۔
جاپان میں حکام امید ظاہر کر رہے ہیں کہ ویکسی نیشن کا عمل سست روی کا شکا ہے البتہ جاری ہے۔
جاپان میں 36 فی صد شہری ویکسین کی دو خوراکیں لے چکے ہیں البتہ وبا کا ڈیلٹا ویریئنٹ بھی تیزی سے پھیل رہا ہے۔
جاپان کے حوالے سے خیال کیا جا رہا ہے کہ اس نے وبا سے بہتر انداز سے نمٹنے میں کامیابی حاصل کی اور اس کو دیگر ممالک کی طرح سخت لاک ڈاؤن نہیں لگانے پڑے البتہ اب اس طرح ہونے کا اندیشہ ظاہر کیا جا رہا ہے۔
جاپان میں یومیہ کیسز میں مسلسل اضافہ ہو رہا ہے اور گزشتہ ایک ہفتے میں 10 ہزار سے زائد کیسز رپورٹ ہو رہے ہیں۔