نیوزی لینڈ میں فائزر ویکسین سے پہلی ہلاکت رپورٹ
نیوزی لینڈ کے حکام نے دعویٰ کیا ہے کہ کرونا ویکسین فائزر سے ایک خاتون کی موت واقع ہوئی ہے جسے ملک میں ویکسین سے پہلی ہلاکت بھی کہا جا رہا ہے۔
نیوزی لینڈ کی وزارتِ صحت نے پیر کو جاری بیان میں کہا ہے کہ کرونا ویکسین کے لیے قائم کردہ آزاد سیفٹی بورڈ ویکسین سے خاتون کی ہلاکت کے معاملے کا جائزہ لے رہا ہے۔
البتہ وزارتِ صحت نے خاتون کی عمر سے متعلق معلومات فراہم نہیں کیں۔
بیان میں مزید کہا گیا ہے کہ خاتون کی موت شاید مایوکارڈیٹس کے باعث ہوئی ہے۔
مایوکارڈیٹس دل کی سوزش کو کہا جاتا ہے جس میں دل کی خون کو پمپ کرنے کی صلاحیت محدود ہو جاتی ہے جو دل کی دھڑکن میں کمی کا باعث بنتی ہے۔
خبر رساں ادارے 'رائٹرز' کے مطابق نیوزی لینڈ میں موجود فائزر کی میڈیا ٹیم سے خاتون کی ہلاکت سے متعلق بذریعہ ای میل رابطہ کیا گیا ہے لیکن فوری طور پر کوئی ردِ عمل سامنے نہیں آیا۔
سیاست اور نظریات کو پسِ پشت رکھتے ہوئے ویکسین لگوائیں، ڈاکٹر فاؤچی کی اپیل
امریکہ میں وبائی امراض کے ماہر ڈاکٹر انتھونی فاؤچی نے خدشہ ظاہر کیا ہے کہ رواں برس کے اختتام تک امریکہ میں کرونا سے مزید ایک لاکھ افراد جان کی بازی ہار سکتے ہیں۔ البتہ اُن کا کہنا تھا کہ بہتر حکمت عملی کے ذریعے ان اموات کو روکا جا سکتا ہے۔
اُن کا کہنا تھا کہ امریکہ میں یہ صلاحیت ہے کہ وہ صورتِ حال کو بگڑنے سے روک سکتا ہے، لیکن اصل مسئلہ وہ آٹھ کروڑ افراد ہیں جنہوں نے تاحال ویکسین نہیں لگوائی۔
ڈاکٹر فاؤچی کا کہنا تھا کہ ضرورت اس بات کی ہے کہ لوگ سیاست اور نظریات کو پسِ پشت رکھتے ہوئے ویکسین لگوائیں۔
امریکی اخبار 'نیو یارک ٹائمز' کی ایک رپورٹ کے مطابق امریکہ میں ہر روز اوسطً ایک لاکھ افراد کرونا کے باعث اسپتالوں میں داخل ہو رہے ہیں۔
کراچی اور حیدرآباد میں انڈور ڈائننگ پر پابندی برقرار
حکومتِ سندھ کے جاری کردہ حکم نامے میں وضاحت کی گئی ہے کہ کراچی اور حیدرآباد میں انڈور ڈائننگ پر پابندی برقرار رہے گی۔
اس سے قبل حکومتِ سندھ کی جانب سے کراچی اور حیدرآباد میں کرونا ویکسین لگوانے والے افراد کے لیے پچاس فی صد گنجائش کی شرط کے ساتھ انڈور ڈائننگ کی اجازت دینے اطلاعات سامنے آئی تھیں۔
لیکن آج جاری ہونے والے نوٹیفیکیشن میں بتایا گیا ہے کہ کراچی اور حیدرآباد میں انڈور ڈائننگ پر پابندی برقرار رہے گی۔
محکمۂ داخلہ سندھ کے جاری کردہ حکم نامے میں یہ وضاحت بھی کی گئی ہے کہ آؤٹ ڈور ڈائننگ کی اجازت بھی رات دس بجے تک ہوگی۔
فرانس میں عوامی مقامات پر کام کرنے والوں کے لیے ہیلتھ کارڈ ساتھ رکھنا لازمی قرار
فرانس میں عوامی مقامات پر کام کرنے والے ملازمین کے لیے ہیلتھ کارڈ ساتھ رکھنا لازمی قرار دے دیا گیا ہے۔
خبر رساں ادارے ’اے ایف پی‘ کے مطابق یہ فیصلہ فرانس کی حکومت کی عوام کو کرونا وائرس کی ویکسی نیشن کرانے کے لیے آمادہ کرنے کی حکمتِ عملی کے تحت کیا گیا ہے۔
اس فیصلے کے بعد فرانس میں کیفے، سنیما گھروں اور پبلک ٹرانسپورٹ جیسے عوامی مقامات پر کام کرنے والوں کو ویکسی نیشن کارڈ یا 72 گھنٹے پہلے کرایا گیا کرونا کا منفی ٹیسٹ دکھانا لازمی ہوگا۔
فرانس میں اس نوعیت کی ملازمتوں سے منسلک لگ بھگ 18 لاکھ افراد پراس پابندی کا اطلاق ہوگا۔
عوام پر پہلے ہی کھانے پینے کی جگہوں اور تفریحی مقامات وغیرہ پر ہیلتھ کارڈ دکھانے کی شرط عائد کی جاچکی ہے۔