بھارت میں ٹیسٹ مثبت آنے کی شرح دو فی صد سے کم
بھارت میں گزشتہ 24 گھنٹوں کے دوران 27 ہزار 176 افراد کے کرونا وائرس سے متاثر ہونے کی تشخیص ہوئی ہے۔
ملک کی وزارتِ صحت کے جاری کردہ اعداد و شمار کے مطابق بھارت میں کرونا کے مثبت کیسز کی شرح 1.69 فی صد ریکارڈ ہوئی ہے۔
بھارت میں گزشتہ 24 گھنٹوں کے دوران 38 ہزار 12 مریض کرونا سے صحت یاب ہوئے ہیں۔
پاکستان میں اموات 27 ہزار سے متجاوز
پاکستان میں کرونا وائرس سے اموات کی تعداد 27 ہزار سے تجاوز کر گئی ہے۔
سرکاری اعداد و شمار کے مطابق ملک بھر میں گزشتہ 24 گھنٹوں میں وبا سے مزید 68 اموات ہوئی ہیں جب کہ ایک دن قبل 66 اموات ہوئی تھی۔
وبا سے ملک بھر میں اب تک مجموعی طور پر 27 ہزار 72 اموات ہو چکی ہیں۔
اعداد و شمار کے مطابق پاکستان میں ایک دن میں سب سے زیادہ اموات رواں برس 27 اپریل کو ریکارڈ کی گئی تھیں جن کی تعداد 201 تھی۔
امریکہ کا نئے سفری نظام پر غور
وائٹ ہاؤس کے ایک سینئر عہدیدار نے کہا ہے کہ امریکہ بین الاقوامی سفر کے لیے ایک نیا نظام تیار کر رہا ہے جس میں یہ معلومات بھی شامل ہوں گی کہ اس دوران مسافروں کا کس کس سے رابطہ ہوا تھا۔
یہ اقدام ایک ایسے وقت میں کیا جا رہا ہے جب کرونا وائرس کے پھیلاؤ کے باعث امریکہ میں داخلے کے لیے بیشتر ممالک پر پابندیاں عائد ہیں۔
وائٹ ہاؤس میں کرونا وائرس پر کنٹرول سے متعلق امور کے کوآرڈینیٹر جیف زینٹس نے یو ایس ٹریول اینڈ ٹورزم ایڈوائزری بورڈ کو بتایا کہ انتظامیہ فوری طور پر کسی بھی سفری پابندی میں نرمی کرنے کا ارادہ نہیں رکھتی۔
زینٹس نے کہا کہ بین الاقوامی سفر کے لیے نیا نظام زیادہ محفوظ ہے۔
ان کا کہنا تھا کہ امریکہ آنے والے غیر ملکی شہریوں کے لیے ویکسی نیشن کی ضرورت پر غور کیا جا رہا ہے۔
پاکستان میں اب بھی 65 ہزار سے زائد افراد زیرِ علاج
پاکستان میں کرونا وائرس سے گزشتہ روز مزید دو ہزار 928 افراد کے متاثر ہونے کی تصدیق ہوئی ہے۔
سرکاری اعداد و شمار کے مطابق ملک بھر میں 24 گھنٹوں میں 57 ہزار سے زائد ٹیسٹ کیے گئے جن میں سے 5.08 فی صد ٹیسٹ مثبت آئے۔
حکام کے مطابق ملک بھر میں زیر علاج 62 ہزار 725 افراد میں سے چار ہزار 960 مریض انتہائی نگہداشت میں ہیں۔