پاکستان میں اموات ساڑھے 27 ہزار ہو گئیں
پاکستان میں کرونا وائرس سے اموات کی مجموعی تعداد ساڑھے 27 ہزار ہو گئی ہے۔
سرکاری اعداد و شمار کے مطابق ملک بھر میں وبا سے مزید 42 افراد ہلاک ہوئے ہیں جس سے اموات کی تعداد 27 ہزار 524 تک پہنچ گئی ہے۔
وبا سے مزید 2060 افراد کی متاثر ہونے کی بھی تصدیق ہوئی ہے۔
پاکستان میں کرونا کے ٹیسٹ مثبت آنے کی شرح 4.58 فی صد ہے۔
پاکستان میں کرونا مثبت کیسز کی شرح چار فی صد سے کم
پاکستان میں کرونا وائرس کی چوتھی لہر بتدریج کمزور پڑ رہی ہے اور مثبت کیسز کی شرح چار فی صد سے بھی کم ہو چکی ہے۔
نیشنل کمانڈ اینڈ آپریشن سینٹر (این سی او سی) کے مطابق پاکستان میں انتہائی نگہداشت کے وارڈز میں زیرِ علاج مریضوں کی تعداد بھی مسلسل کم ہو رہی ہے۔
ہفتے کو ملک بھر میں کرونا کی تشخیص کے لیے 44 ہزار 712 ٹیسٹ کیے گئے جن میں سے 1780 مثبت آئے ہیں۔
پاکستان میں کرونا وائرس کے باعث اب تک 27 ہزار 566 افراد ہلاک ہو چکے ہیں جب کہ 12 لاکھ 38 ہزار 668 افراد میں اب تک وائرس کی تصدیق ہو چکی ہے۔
دنیا بھر میں کرونا ویکسین کی چھ ارب ڈوزز لگا دی گئیں
امریکہ کی جانز ہاپکنز یونیورسٹی، ریسورچ سینٹر کے اعداد و شمار کے مطابق دنیا بھر میں اب تک کرونا ویکسین کی چھ ارب خوراکیں لگا دی گئی ہیں۔
سینٹر کے مطابق ہفتے کی دوپہر تک دنیا بھر میں چھ ارب سے زائد افراد کو ویکسین کی کم سے کم ایک خوراک لگ چکی ہے۔
یہ اعداد و شمار ایسے وقت میں سامنے آئے ہیں جب امریکہ کے صدر جو بائیڈن نے جمعے کو اعلان کیا تھا کہ امریکہ میں چھ کروڑ شہری ویکسین کے بوسٹر شاٹس لگوانے کے اہل ہیں۔
امریکی صدر نے زور دیا تھا کہ اہل افراد فوری طور پر بوسٹر شاٹس لگوا لیں کیوں کہ وہ بھی بہت جلد بوسٹر ڈوز لگوا لیں گے۔
امریکہ میں صحتِ عامہ کے نگراں ادارے سینٹرز فار ڈیزیز کنٹرول اینڈ پروینشن (سی ڈی سی) نے جمعرات کو 65 برس یا اس سے زائد عمر کے امریکی شہریوں کے لیے فائزر ویکسین کے بوسٹر شاٹس کی منظوری دی تھی۔
آسٹریلیا: ریاست وکٹوریا میں کرونا کا پھیلاؤ جاری
آسٹریلیا کی ریاست وکٹوریا میں اتوار کو کرونا وائرس کے مزید 779 کیسز اور 2 اموات رپورٹ ہوئی ہیں۔
خیال رہے کہ آسٹریلیا کی دو ریاستیں وکٹوریا اور نیو ساؤتھ ویلز کو کرونا وبا کے ڈیلٹا ویریئنٹ پر قابو پانے میں مشکلات کا سامنا ہے۔ جب کہ ان ریاستوں کی 80 فی صد آبادی کی ویکسی نیشن جلد مکمل کرنے کے عمل کو تیز کر دیا گیا ہے۔
آسٹریلیا میں اب تک تین چوتھائی آبادی کو کرونا ویکسین کی ایک خوراک جب کہ نصف آبادی کو ویکسین کی دونوں خوراکیں لگ چکی ہیں۔
وزیراعظم اسکاٹ موریسن کا ایک اتوار کو انٹرویو میں کہنا تھا کہ وہ امید کرتے ہیں کہ ریاستیں جب 80 فی صد آبادی کو ویکسین لگانے کا ہدف عبور کر لیں گی تو پابندیاں نرم کر دی جائیں گی۔