لیونل میسی بھی کرونا وائرس کا شکار
ارجنٹائن کے فٹ بالر اسٹار لیونل میسی بھی کرونا وائرس کا شکار ہو گئے ہیں۔
لیونل میسی کے علاوہ فرانسیسی کلب پیرس سینٹ جرمین (پی ایس جی) کے تین کھلاڑیوں کا کرونا ٹیسٹ بھی مثبت آیا ہے۔
خبر رساں ادارے 'رائٹرز' کے مطابق پی ایس جی کلب کے دفاعی کھلاڑی، گول کیپر اور مڈ فیلڈر بھی کرونا وائرس کا شکار ہوئے ہیں جس کے بعد چار کھلاڑی قرنطینہ یا تنہائی میں چلے گئے ہیں۔
چونتیس سالہ میسی نے گزشتہ برس اگست میں بارسلونا کلب کو خیر آباد کہہ کر پی ایس جی میں شمولیت اختیار کی تھی۔
امریکی وزیرِ دفاع بھی کرونا وائرس سے متاثر
امریکہ میں کرونا وائرس کی نئی قسم اومیکرون تیزی سے پھیل رہی ہے۔ وزیرِ دفاع لائڈ آسٹن بھی کرونا وائرس سے متاثر ہو گئے ہیں۔
اتوار کو ایک بیان میں پینٹاگان کے سربراہ کا کہنا تھا کہ انہیں 'معمولی' علامات ہیں اور انہوں نے آئندہ پانچ دنوں کے لیے خود کو گھر میں قرنطینہ کرلیا ہے۔
انہوں نے کہا کہ وہ مکمل ویکسین شدہ ہیں اور انہوں نے بوسٹر شاٹ بھی لگوا رکھی ہے جس کی وجہ سے انہیں معمولی علامات ہیں ورنہ یہ زیادہ ہو سکتی تھیں۔
امریکہ سمیت دنیا بھر میں ہزاروں پروازیں منسوخ
کرونا وائرس کے اومیکرون ویریئنٹ کے تیزی سے پھیلاؤ کے باعث ایک بار پھر دنیا بھر میں نظام زندگی متاثر ہو رہا ہے۔ امریکہ سمیت دنیا کے کئی ملکوں میں سالِ نو کے آغاز پر ہی چار ہزار سے زائد پروازیں منسوخ کر دی گئی ہیں۔
اومیکرون ویریئنٹ نے امریکہ، یورپ، برطانیہ سمیت دنیا کے کئی ممالک کو اپنی لپیٹ میں لے رکھا ہے جس کے بعد کئی ممالک دوبارہ پابندیاں سخت کر رہے ہیں۔
خبر رساں ادارے 'رائٹرز' کے مطابق اتوار کو سخت موسم اور اومیکرون ویریئنٹ کے تیزی سے پھیلاؤ کے باعث صرف امریکہ میں لگ بھگ 2400 فلائٹس منسوخ کی گئیں۔
کرسمس اور سالِ نو کی تعطیلات کے موقع پر لاکھوں لوگ سفر کرتے ہیں، تاہم اومیکرون ویریئنٹ کے باعث پروازوں کو منسوخ کیا جا رہا ہے۔
اومیکرون کے باعث پاکستان میں کرونا کی پانچویں لہر، کراچی سب سے زیادہ متاثر
پاکستان میں کرونا وائرس کے نگراں ادارے نیشنل کمانڈ اینڈ آپریشن سینٹر (این سی او سی) نے کہا ہے کہ ملک میں کرونا وائرس کی پانچویں لہر تیزی سے پھیل رہی ہے اور کراچی میں کرونا مثبت کیسز کی شرح دو سے بڑھ کر چھ فی صد ہو گئی ہے۔
پیر کو اسلام آباد میں این سی او سی کے اجلاس کے بعد جاری ایک اعلان کے مطابق ملک میں بیماری کے پھیلاؤ کا جائزہ لیا گیا اور یہ انکشاف ہوا کہ اومیکرون کیسز پر مشتمل کرونا کی پانچویں لہر تیزی سے پھیل رہی ہے۔
این سی او سی کے مطابق گزشتہ تین روز میں کراچی میں سب سے زیادہ مثبت کیسز رپورٹ ہوئے ہیں اور وہاں مثبت کیسز کی شرح دو سے بڑھ کر چھ فی صد ہو گئی ہے۔
خیال رہے کہ پاکستان میں کرونا وائرس کے کیسز میں ایک مرتبہ پھر اضافہ دیکھا جا رہا ہے اور گزشتہ تین روز سے ملک میں مثبت کیسز کی شرح ایک فی صد سے زائد ہے۔
تین جنوری کے سرکاری اعداد و شمار کے مطابق ملک میں گزشتہ 24 گھنٹوں میں 45 ہزار 643 افراد کے کرونا ٹیسٹ کیے گئے جس میں سے 708 میں وائرس کی تشخیص ہوئی۔
پاکستان میں کرونا سے مزید دو اموات بھی ہوئی ہیں۔