سندھ میں گھر گھر ویکسی نیشن کی مہم شروع
سندھ حکومت نے کرونا وائرس کے انسداد کے لیے گھر گھر جا کر ویکسی نیشن شروع کرنے کی مہم کا آغاز کر دیا ہے۔
مقامی میڈیا کے مطابق اس مہم میں 12 برس یا اس سے زائد عمر کے ان افراد جو ویکسین لگائی جائے گی جن کو اب تک ویکسین کی کوئی بھی ڈوز نہیں لگی جب کہ ان افراد کو ویکسین کی دوسری ڈوز لگائی جائے گی جن کو پہلی ڈوز لگائی جا چکی ہے۔
سندھ حکومت کا کہنا ہے کہ اس مہم میں ان علاقوں تک رسائی کی کوشش کی جائے گی جہاں کے لوگوں کو ویکسین لگوانے کے لیے دشواری کا سامنا کرنا پڑتا ہے۔
پاکستان میں کرونا سے چار ماہ بعد 30 سے زائد افراد ہلاک
پاکستان میں کرونا وائرس سے مزید 32 افراد ہلاک ہوئے ہیں جو کہ چار ماہ بعد یومیہ کیسز کی سب سے زیادہ تعداد ہے۔
سرکاری اعداد و شمار کے مطابق پاکستان میں گزشتہ 24 گھنٹوں میں ہونے والی اموات کے بعد مجموعی ہلاکتیں 29 ہزار301 ہو گئی ہیں۔
واضح رہے کہ پاکستان میں نومبر میں اموات کی شرح میں کمی آنا شروع ہو گئی تھی البتہ گزشتہ ماہ کے وسط سے ایک بار پھر کرونا سے اموات بڑھنا شروع ہو گئی ہیں۔
پاکستان میں کرونا سے مزید پانچ ہزار افراد متاثر
پاکستان میں کرونا سے مزید پانچ ہزار327 افراد متاثر ہوئے ہیں۔
سرکاری اعداد و شمار کے مطابق ملک بھر میں 55 ہزار202 ٹیسٹ کیے گئے جن کے مثبت آنے کی شرح 9.65 رہی۔ یوں پانچ ہزار سے زائد افراد کے وبا سے متاثر ہونے کی تصدیق ہوئی۔
حکام کے مطابق وبا سے متاثرہ زیرِ علاج افراد میں سے 15 سو افراد انتہائی نگہداشت میں ہیں۔
پاکستان بھر میں موبائل ویکسی نیشن کا اعلان
وفاقی وزیر اور نیشنل کمانڈ اینڈ آپریشن سینٹر کے سربراہ اسد عمر نے ملک بھر میں موبائل ویکسی نیشن کا اعلان کیا ہے۔
اسلام آباد میں پریس بریفنگ میں اسد عمر کا کہنا تھا کہ وہ علاقے جہاں ویکسین شدہ افراد کی تعداد زیادہ ہے وہاں کرونا کی پانچویں لہر سے کم نقصان ہوا ہے۔
ان کا کہنا تھا کہ ویکسین مہم میں موبائل ویکسی نیشن کا آغاز کیا جا رہا ہے جس کے ذریعے 55 ہزار سے زائد موبائل ٹیمیں گھر گھر ویکسین لگائیں گی۔
وفاقی وزیر نے بتایا کہ مہم کا آغاز یکم فروری سے کیا جا رہا ہے جب کہ یہ مہم دو ہفتوں تک جاری رہے گی۔
واضح رہے کہ حکومت کا اس مہم کے دوران ساڑھے تین کروڑ افراد کو ویکسین لگانے کا ہدف مقرر کیا گیا ہے۔