وزیرِ اعظم ڈاکٹر من موہن سنگھ نے ، جو کہ امریکہ اور برازیل کا آٹھ روزہ دورہ مکمل کرکے نئی دہلی پہنچے ہیں، کہا ہے کہ امریکی صدر براک اوباما اگست یا اکتوبر میں بھارت کا دورہ کریں گے۔
تاہم، اُنھوں نے نامہ نگاروں سے بات چیت میں کہا کہ ابھی اُن کے دورے کی تاریخ مقرر نہیں ہوئی۔
اُنھوں نے چین سے متعلق ایک سوال کے جواب میں کہا کہ عالمی برادری کو چین کی ترقی کے برعکس بھارت کی ترقی کے بارے میں کوئی خدشات نہیں ہیں۔ عالمی برادری اِس بارے میں بھارت کے ساتھ ہمدردانہ رویہ رکھتی ہے اور بھارت کی ترقی کی متمنی ہے۔ اُن کے بقول، ‘ہم اِس سے فائدہ اُٹھائیں گے، ا ور اِس رجحان کو ضائع نہیں ہونے دیں گے۔’
تاہم، اُنھوں نے یہ بھی کہا کہ بھارت کو پہلے غریبی ا ور پس ماندگی جیسے گھریلو مسائل کا سامنا ہے۔ اُن کے الفاظ میں: ‘ہمیں ناخواندگی، غریبی اور امراض جیسے مسائل پر قابو پانے کی ضرورت ہے۔’
خیال رہے کہ وزیرِ اعظم من موہن سنگھ نے واشنگٹن میں جوہری سلامتی سے متعلق سربراہی کانفرنس اور برازیل میں کئی فریقوں کی کانفرنس میں شرکت کے موقع پر تقریباً 50عالمی رہنماؤں سے ملاقات اور باہمی دلچسپی کے امور پر تبادلہٴ خیال کیا تھا۔
وہ ہفتے کے روز نئی دہلی لوٹ آئے ہیں۔