رسائی کے لنکس

logo-print

سینیٹ انتخابات: حفیظ شیخ کو شکست، یوسف رضا گیلانی اسلام آباد سے جیت گئے

اسلام آباد سے سینیٹ کی نشست پر یوسف رضا گیلانی نے 169 ووٹ لے کر کامیابی حاصل کی۔ حکمراں اتحاد کے اُمیدوار عبدالحفیظ شیخ کو 164 ووٹ ملے۔ حکومت نے یوسف رضا گیلانی کی کامیابی کو چیلنج کرنے کا اعلان کیا ہے۔


19:38 3.3.2021

بلوچستان سے سینیٹ انتخابات کے غیر سرکاری نتائج جاری

پاکستان میں سینیٹ انتخابات کے بعد نتائج آنے کا سلسلہ جاری ہے۔ بلوچستان سے سینیٹ کی 12 نشستوں کے نتائج سامنے آ گئے ہیں۔

غیر حتمی اور غیر سرکاری نتائج کے مطابق بلوچستان کی سات جنرل نشستوں پر مولانا عبدالغفور حیدری، محمد عبدالقادر، محمد قاسم، پرنس احمد عمر احمد زئی، عمر فاروق، سرفراز بگٹی، منظور احمد کامیاب قرار پائے ہیں۔

ٹیکنو کریٹس کی نشستوں پر کامران مرتضٰی اور سید احمد ہاشمی جب کہ خواتین کی دو نشستوں پر ثمینہ ممتاز اور نسیمہ احسن جب کہ اقلیتوں کی نشست پر دنیش کمار کامیاب ہوئے ہیں۔

19:07 3.3.2021

عمران خان کے پاس اب وزیرِ اعظم ہاؤس میں رہنے کا کوئی جواز نہیں: مریم نواز

پاکستان مسلم لیگ (ن) کی نائب صدر مریم نواز نے اسلام آباد سے سینیٹ کی نشست پر یوسف رضا گیلانی کی کامیابی کو پی ڈی ایم کی بڑی فتح قرار دیا ہے۔

اپنی ایک ٹوئٹ میں مریم نواز کا کہنا تھا کہ اب وزیرِ اعظم عمران خان کے پاس عہدے پر قائم رہنے کا کوئی اخلاقی جواز نہیں ہے۔

مریم نواز کا کہنا تھا کہ دباؤ کے باوجود اراکینِ اسمبلی نے جھکنے اور بکنے سے انکار کر دیا۔ اُن کے بقول یہ نواز شریف کے بیانیے کی بھی فتح ہے۔

19:05 3.3.2021

یوسف رضا گیلانی کی کامیابی پر پاکستان میں سیاسی بھونچال

18:53 3.3.2021

حکمراں جماعت کو دھچکہ، اسلام آباد سے یوسف رضا گیلانی کامیاب

پاکستان میں سینیٹ انتخابات کے لیے اسلام آباد کی نشست پر اپوزیشن جماعتوں کے اُمیدوار یوسف رضا گیلانی نے عبدالحفیظ شیخ کو اپ سیٹ شکست دے دی ہے۔ الیکشن کمیشن آف پاکستان کے مطابق یوسف رضا گیلانی نے 169 جب کہ عبدالحفیظ شیخ نے 164 ووٹ حاصل کیے۔

الیکشن کمیشن کے مطابق 340 اراکینِ اسمبلی نے اپنا حقِ رائے دہی استعمال کیا جن میں سے سات اراکین کے ووٹ مسترد ہوئے۔

اسلام آباد سے خواتین کی نشست پر پاکستان تحریک انصاف کی فوزیہ ارشد 174 ووٹ لے کر کامیاب ہوئی ہیں جب کہ اُن کی مدمقابل فرزانہ کوثر نے 161 ووٹ حاصل کیے۔

وزیراعظم کے معاون خصوصی شہباز گل نے کہا ہے کہ یوسف رضا گیلانی کی کامیابی کو چیلنج کیا جائے گا۔

چیئرمین پیپلزپارٹی بلاول بھٹو زرداری نے یوسف رضا گیلانی کی کامیابی پر ٹوئٹ کی ہے جس میں کہا گیا ہے کہ 'جمہوریت بہترین انتقام ہے۔'

مزید لوڈ کریں

فیس بک فورم

XS
SM
MD
LG