'فیصل آباد سے قافلے بنی گالہ کے لیے رواں دواں'

تحریکِ انصاف کے رہنما فواد چوہدری کا کہنا ہے کہ فیصل آباد سے بسوں میں قافلے بنی گالہ کے لیے رواں دواں ہیں۔

فواد چوہدری نے پی ٹی آئی کارکنان کو ہدایت کی کہ "آپ جہاں بھی ہیں آج بنی گالہ پہنچیں اور عمران خان کے ساتھ یکجہتی کا اظہار کریں۔"

پی ٹی آئی کارکن بدستور بنی گالہ میں موجود

پاکستان تحریکِ انصاف نے عمران خان کی بنی گالہ میں رہائش گاہ کے باہر کی ایک ویڈیو جاری کی ہے جس میں پی ٹی آئی کارکنان کو دیکھا جا سکتا ہے۔

پی ٹی آئی کے آفیشل اکاؤنٹ سے جاری اس ویڈیو پر لکھا گیا ہے کہ رات گزر گئی اور صبح ہو گئی لیکن کارکنان بنی گالہ میں ہی موجود ہیں۔

پی ٹی آئی کے حامی یوٹیوبر جمیل فاروقی گرفتار

اسلام آباد پولیس نے ایک ٹویٹ میں بتایا ہے کہ یوٹیوبر جمیل فاروقی کو کراچی سے گرفتار کر لیا گیا ہے۔

پولیس کے مطابق جمیل فاروقی کے خلاف اسلام آباد کیپٹل پولیس پر جھوٹے الزامات لگانے پر تھانہ رمنا میں مقدمہ درج ہے۔

یوٹیوبر نے حال ہی میں اپنے ایک وی لاگ میں الزام عائد کیا تھا کہ تحریکِ انصاف کے گرفتار رہنما شہباز گل پر پولیس نے جنسی اور جسمانی تشدد کیا ہے۔

پولیس نے مزید کہا ہے کہ اشتعال انگیز، من گھڑت اور جھوٹے الزامات لگانے والوں کے خلاف اسلام آباد کیپٹل پولیس نے کارروائی کا عندیہ دیا تھا۔

عمران خان کی اسلام آباد ہائی کورٹ میں حفاظتی ضمانت کی درخواست، رجسٹرار کا اعتراض

چیئرمین تحریکِ انصاف عمران خان نے دہشت گردی کی دفعات کے تحت درج مقدمے میں حفاظتی ضمانت کے لیے پیر کی صبح اسلام آباد ہائی کورٹ میں درخواست جمع کرا دی ہے۔

رجسٹرار اسلام آباد ہائی کورٹ نے عمران خان کی درخواست پر اعتراض اٹھایا کہ انسدادِ دہشت گردی کی عدالت جانے کے بجائے اسلام آباد ہائی کورٹ کیوں آ گئے۔

رجسٹرار نے یہ بھی اعتراض اٹھایا کہ درخواست گزار نے بائیو میٹرک بھی نہیں کرایا۔