بھارتی فضائیہ کے سربراہ پی وی نائیک نے ملک کے پڑوس میں سلامتی کی موجودہ صورتِ حال کو ایسے آتش فشاں سے تعبیر کیا ہے جو کسی بھی وقت پھٹ سکتا ہے۔
اُنھوں نے فوجی جوانوں سے کہا کہ وہ کسی بھی قسم کے داخلی اور بیرونی چیلنجوں سے نمٹنے کے لیے تیار ہیں۔
پی بی نائیک ، غازی آباد کے قریب ہِنڈن ایئر بیس پر جہاں انڈین ایئر فورس کا ‘ یوم ِقیام’ منایا گیا جوانوں سے خطاب کر رہے تھے۔ اُنھوں نے کہا کہ آتش فشاں بغیر اطلاع کے پھٹ سکتا ہے۔
اُنھوں نے مزید کہا کہ مستقبل میں 126‘ایم ایم آر سی اے’ ہوا میں ایندھن بھرنے والی صلاحیت والے طیاروں اور‘ آواکس ’کو شامل کیے جانے سے فضائیہ میں تکنیکی سطح پر نئے چیلنج آئیں گے جِن کا مقابلہ کرنے کے لیے نئی صلاحیتوں کی ضرورت ہے۔
بعد میں میڈیا سے بات چیت میں پی وی نائیک نے کہا کہ اُنھوں نے سلامتی کی موجودہ صورتِ حال کو اِس لیے آتش فشاں سے تعبیر کیا ہے کہ کوئی نہیں جانتا کہ حالات کب بدل جائیں۔
فوج کی جدید کاری اور اُس میں نئی تکنیک شامل کیے جانے کے بارے میں اُنھوں نے کہا کہ اگلی دہائی تک فوج کے بیڑے میں ‘ایم ایم آر سی اے’ اور‘ ففتھ جنریشن’ کے جنگی طیارے شامل ہو جائیں گے جِس سے فوج کو قومی مفادات کے تحفظ میں مدد ملے گی۔