انگلینڈ کرکٹ ٹیم کے سابق کھلاڑی کیون پیٹرسن اور پاکستانی کرکٹر احمد شہزاد کی انسٹا گرام پر ہونے والی ویڈیو چیٹ سوشل میڈیا پر موضوعِ بحث بنی ہوئی ہے۔
کرونا وائرس کے پھیلاؤ کے باعث مشہور کرکٹرز بھی اپنا زیادہ تر وقت گھر پر ہی گزار رہے ہیں۔ ایسے میں بعض کرکٹرز انسٹا گرام پر لائیو سیشن کر رہے ہیں۔ کیون پیٹرسن اس حوالے سے خاصے متحرک ہیں۔
ایسے ہی ایک لائیو سیشن میں کیون پیٹرسن، احمد شہزاد سے یہ سوال کر رہے ہیں کہ آپ گراؤنڈ میں اچھی کارکردگی دکھانے میں مسلسل کیوں ناکام ہو رہے ہیں۔
یاد رہے کہ کیون پیٹرسن پاکستان سپر لیگ میں کوئٹہ گلیڈی ایٹر کی ٹیم کی نمائندگی کر چکے ہیں۔
چونکہ احمد شہزاد کوئٹہ گلیڈی ایٹر کا حصہ ہیں اس لیے انہوں نے احمد شہزاد سے جب سوال پوچھا تو اُس پر احمد شہزاد نے جواب دیتے ہوئے کہا کہ میں ہر میچ کے دوران اپنا سو فی صد دینے کی کوشش کرتا ہوں، لیکن فارم میں نہ ہونے کے باعث کچھ چیزیں انسان کے بس میں نہیں ہوتیں۔
کیون پیٹرسن، احمد شہزاد کے جواب سے مطمئن نہیں ہوئے۔ انہوں نے دوبارہ سوال کیا کہ "شہزاد مجھے تم روایتی جواب دے کر مت ٹرخاؤ، اصل بات بتاؤ تم کیوں اچھی کارکردگی نہیں دکھا پا رہے۔"
کیون پیٹرسن کے اصرار پر احمد شہزاد کچھ سٹپٹا جاتے ہیں۔ احمد شہزاد اپنے بیٹنگ آرڈر کو ناقص کارکردگی کی وجہ قرار دیتے ہوئے کہتے ہیں کہ اُنہوں نے پہلی بار نمبر تین پر بیٹنگ کی۔ حالانکہ وہ اننگز کا آغاز کرتے رہے ہیں۔ لہذٰا اسی وجہ سے وہ کارکردگی دکھانے میں ناکام رہے۔
ایک موقع پر کیون پیٹرسن احمد شہزاد سے کہتے ہیں کہ تم اب بھی وہی فضول باتیں کر رہے ہو، جو تم ڈریسنگ روم میں کرتے تھے۔ میری سمجھ میں کچھ نہیں آ رہا۔ جس پر احمد شہزاد جواب دیتے ہیں کہ دوست آپ میری بات غور سے سنیں۔
Kevin Peterson got no chill, Roasted Ahmad Shahzad badly. @robelinda2 gotta see this. pic.twitter.com/T6kSiyiWoH
— Hooman (@hukan01) March 30, 2020
سوشل میڈیا پر دونوں کرکٹرز کی گفتگو وائرل ہو چکی ہے۔ بعض پاکستانی صارفین نے کیون پیٹرسن کو سراہا کہ اُنہوں نے احمد شہزاد کے ساتھ بالکل ٹھیک کیا۔ تاہم بعض نے اسے کیون پیٹرسن کا نامناسب رویہ قرار دیا۔
البتہ، کرکٹر احمد شہزاد نے اپنی ٹوئٹ میں وضاحت کی کہ موجودہ مشکل حالات میں اگر کوئی مثبت باتیں اُجاگر کرتا ہے یا چہروں پر مسکراہٹیں لاتا ہے تو اس کی حوصلہ افزائی کرنی چاہیے۔
احمد شہزاد نے کہا کہ یہ دو دوستوں کے درمیان بے تکلف گفتگو تھی، لہذٰا اسے کوئی اور رنگ نہ دیا جائے۔
In times of a global crisis, if some1 is trying to spread positivity &a few laughs it should be encouraged rather than being criticised.It was all about a fun chat between two good friends. Please don’t manipulate a banter as mocking.Grow up!! https://t.co/BF1cfL9xq1
— Ahmad Shahzad 🇵🇰 (@iamAhmadshahzad) March 31, 2020
کیون پیٹرسن نے بھی انسٹا گرام کے اس لائیو سیشن پر سوشل میڈیا پر ردعمل کو بلاجواز قرار دیتے ہوئے کہا کہ ہم نے ایک اچھے ماحول میں گفتگو کی، جس طرح ہم ڈریسنگ روم میں کرتے تھے۔
Buddy, we had a fun laugh yesterday & treated each other like we were in the dressing room. Dickheads will ruin this for the fun people who actually laughed and enjoyed it like we did! You keep doing the great charity work up in North PAK! 👍🏻
— Kevin Pietersen🦏 (@KP24) March 31, 2020
خیال رہے کہ کرکٹر احمد شہزاد پاکستان سپر لیگ سیزن فائیو میں خاطر خواہ کارکردگی نہیں دکھا سکے تھے۔ اس سے قبل اُنہیں سری لنکا کے خلاف ٹی ٹوئنٹی سیریز میں پاکستان ٹیم کی نمائندگی کا بھی موقع ملا تھا لیکن اُس میں بھی وہ اچھی کارکردگی دکھانے سے قاصر رہے تھے۔