امریکہ میں ایک اور طوفان 'نکولس' ساحلی پٹی 'گلف کوسٹ' کی جانب بڑھ رہا ہے جس کے باعث ریاستِ ٹیکساس اور حال ہی میں طوفان آئیڈا کی زد میں آنے والی ریاستِ لوئزیانا کے ساحلی علاقوں میں شدید بارشیں اور سیلاب کا خطرہ ہے۔
خبر رساں ادارے 'ایسوسی ایٹڈ پریس' کے مطابق میامی میں نیشنل ہریکین سینٹر نے پیش گوئی کی ہے کہ نکولس طوفان مزید شدت اختیار کر سکتا ہے۔ یہ شمال سے شمال مغرب کی جانب فورکاسٹ ٹریک پر 15 میل فی گھنٹے کی رفتار سے آگے بڑھ رہا ہے جو پیر کو جنوبی ٹیکساس کے ساحل کے قریب سے گرزے گا جس کے بعد یہ پیر کی شام تک جنوب یا وسطی ٹیکساس کے ساحل کی جانب مڑ جائے گا۔
ٹیکساس میں پورٹ ارنسس سے فری پورٹ تک طوفان سے متعلق وارننگ جاری کی گئی ہے جب کہ حکام نے ان علاقوں میں شدید بارش اور اربن فلڈنگ کے امکانات ظاہر کیے ہیں۔
طوفان کے باعث ٹیکساس اور جنوب مغربی لوئزیانا میں 25 سینٹی میٹر تک بارش متوقع ہے۔
Flash flooding is possible over portions of coastal Texas and Louisiana through the middle of the week as Tropical Storm #Nicholas is expected to produce storm total rainfall of 5 to 10 inches, with isolated maximum amounts of 15 inches across those areas. https://t.co/tW4KeGdBFb pic.twitter.com/VgzKk7h43H
— National Hurricane Center (@NHC_Atlantic) September 12, 2021
ٹیکساس کے گورنر گریگ ایبٹ نے کہا کہ ٹیکساس گلف کوسٹ کے ساتھ ہوسٹن کے علاقوں میں ریسکیو ٹیموں کو تعینات اور وسائل فراہم کردیے گئے ہیں۔
انہوں نے ایک ویڈیو پیغام میں کہا کہ طوفان کے باعث شدید بارشیں ہو سکتی ہیں۔ گلف کوسٹ کے ساتھ مختلف علاقوں میں ہواؤں اور ممکنہ طور پر سیلاب کی صورتِ حال پیدا ہو سکتی ہے۔ انہوں نے عوام پر زور دیا کہ موسم سے متعلق مقامی الرٹس اور وارننگ کو ملحوظِ خاطر رکھیں۔
ادھر لوئزیانا کے گورنر جان بیل ایڈورڈز نے اتوار کی شب ہی ریاست میں ایمرجنسی نافذ کر دی۔
All of Southern Louisiana — but especially Southwest Louisiana — should keep a close eye on Tropical Storm Nicholas, which could bring heavy rains & flash flooding to the state in the next few days. Listen to local officials, monitor local news & stay prepared. #lagov #lawx pic.twitter.com/D8EFP5RQPL
— John Bel Edwards (@LouisianaGov) September 12, 2021
ایڈورڈز نے کہا کہ لوئزیانا میں سب سے زیادہ خطرہ جنوب مغربی حصے میں ہے جہاں طوفان لورا اور مئی میں آنے والے سیلاب سے ہونے والی تباہی کے بعد بحالی کا کام اب بھی جاری ہے۔
ان کے بقول، اس علاقے میں تیز بارشیں اور سیلابی صورتِ حال کا امکان ہے جب کہ یہ بھی متوقع ہے کہ رواں ہفتے پورے جنوبی لوئزیانا میں تیز بارشیں ہوں، بشمول ان علاقوں میں جو حال ہی میں سمندری طوفان آئیڈا سے متاثر ہوئے ہیں۔
واضح رہے کہ گزشتہ دنوں امریکہ کی ریاست لوئزیانا میں سمندری طوفان آئیڈا نے تباہی مچادی تھی اور بجلی کا نظام درہم برہم ہو کر رہ گیا تھا۔ طوفان کے باعث 26 افراد ہلاک بھی ہوئے تھے۔
لوئزیانا کے بیشتر مکین اب بھی بجلی سے محروم ہیں۔ یوٹیلٹی ٹریکنگ سائٹ پاور آؤٹریج یو ایس کے مطابق پیر تک ایک لاکھ سے زائد صارفین بجلی سے محروم تھے۔
اس خبر میں شامل معلومات خبر رساں ادارے 'ایسوسی ایٹڈ پریس' سے لی گئی ہیں۔