بھارت کی ریاست مدھیا پردیش کے شہر گوالیار کے قریبمشقوں کے دوران بھارتی فضائیہ کےدو لڑاکا طیارے تباہ ہوگئے ہیں جس کے نتیجے میں ایک پائلٹ ہلاک ہوگیا ہے۔
خبر رساں ادارے 'اے ایف پی' کے مطابق دونوں طیاروں نے ہفتے کی صبح گوالیار فضائی اڈے سے اڑان بھری تھی جس کے کچھ دیر بعد ہی وہ زمین پر آ گرے۔
تباہ ہونے والے طیاروں میں ایک روسی ساختہ سکھئی سو 30 تھا جس میں دو پائلٹ سوار تھے۔ دوسرا طیارہ فرانسیسی ساختہ میراج 2000 تھا جسے ایک پائلٹ اڑا رہا تھا۔
بھارتی فضائیہ کے مطابق ''دونوں طیاروں کو حادثہ گوالیار کے قریب پیش آیا۔ طیارے معمول کی تربیتی پرواز پر تھے۔''
فضائیہ کا کہنا تھا کہ واقعے کی وجہ جاننے کے لیے تحقیقات کا حکم دے دیا گیا ہے۔
Two fighter aircraft of IAF were involved in an accident near Gwalior today morning. The aircraft were on routine operational flying training mission.One of the three pilots involved, sustained fatal injuries. An inquiry has been ordered to determine the cause of the accident.
— Indian Air Force (@IAF_MCC) January 28, 2023
بھارتی میڈیا رپورٹس کے مطابق سکھئی سو 30 کے دونوں پائلٹس کو معمولی زخم آئے ہیں جبکہ مراج 2000 کا پائلٹ شدید زخموں کے بعد چل بسا ہے۔
رپورٹس کےمطابق طیاروں کا ملبہ ریاست راجستھان کے شہر بھرت پور اور مدھیا پردیش کے شہر مورینا سے ملا ہے۔
بھارتی نشریاتی ادارے انڈیا ٹو ڈے کے مطابق مورینا کے ایس پی کا کہنا تھا کہ ایک طیارے میں دو پائلٹس تھے جنہوں نے خود کو باحفاظت طریقے سے ریسکیو کرلیا جب کہ تیسرے پائلٹ کے جسم کے ٹکڑے ملے ہیں۔
ریاستِ مدھیا پردیش کے وزیرِاعلیٰ شوراج سنگھ چوہان نے ایک ٹوئٹ میں کہا کہ مقامی انتظامیہ کو ہدایت دی ہے کہ وہ فضائیہ کے امدادی اور بحالی کے کاموں میں تعاون کرے۔
मुरैना के कैलारस के पास वायुसेना के सुखोई-30 और मिराज-2000 विमानों के दुर्घटनाग्रस्त होने की खबर अत्यंत दुखद है। मैंने स्थानीय प्रशासन को त्वरित बचाव एवं राहत कार्य में वायुसेना के सहयोग के निर्देश दिए हैं। विमानों के पायलट के सुरक्षित होने की ईश्वर से कामना करता हूं।
— Shivraj Singh Chouhan (@ChouhanShivraj) January 28, 2023
واضح رہے کہ بھارت میں اس سے قبل بھی جنگی طیاروں اور ہیلی کاپٹرز کو حادثات پیش آ چکے ہیں۔
گزشتہ برس اکتوبر میں ریاست اروناچل پردیش میں چین کے ساتھ متنازع سرحد کے قریب ایک ہیلی کاپٹر تباہ ہوگیا تھا جس کے نتیجے میں پانچ فوجی ہلاک ہوئے تھے۔ اسی ماہ اروناچل پردیش کے ہی علاقے تونگ میں چیتا ہیلی کاپٹر بھی تباہ ہوا تھا۔ اس واقعے میں پائلٹ ہلاک ہوا تھا۔
یاد رہے کہ دسمبر 2021 میں بھارت کے پہلے چیف آف ڈیفنس اسٹاف جنرل بپن راوت سمیت 13 افراد روسی ساختہ ایم آئی 17 ہیلی کاپٹر کے تباہ ہونے سے ہلاک ہوگئے تھے۔
اس خبر میں شامل بعض معلومات خبر رساں ادارے 'اے ایف پی' سے لی گئی ہیں۔