پاکستان کے عوام نے آج کپتان پر اعتماد کا اظہار کر دیا: شاہ محمود قریشی
پاکستان کے وزیرِ خارجہ اور تحریک انصاف کے نائب صدر شاہ محمود قریشی نے کہا ہے کہ پاکستان کے عوام نے آج کپتان پر اعتماد کا اظہار کر دیا ہے۔
پریڈ گراؤنڈ جلسے سے خطاب میں شاہ محمود نے کہا کہ وزیرِ اعظم عمران خان تنہا ایک طرف کھڑے ہیں اور ان کے مخالفین سب یکجا ہو گئے ہیں۔ مخالفین کا منشور، جھنڈا، نشان، منزل کچھ بھی ایک نہیں۔
ان کے بقول وزیرِ اعظم کے مخالفین صرف ان کے بغض میں ایک ساتھ ہو گئے ہیں اور وہ عمران خان کا سر جھکانے کے لیے ایک ہوئے ہیں۔
شاہ محمود قریشی نے کہا کہ آج قوم نے فیصلہ کرنا ہے کہ ہم ضمیر نہیں بیچیں گے، سودا نہیں کریں گے اور کھڑے رہیں گے۔
شاہ محمود نے دعویٰ کیا کہ اپوزیشن نے عمران خان کو پیغام بھیجا ہے اور وہ کہتے ہیں کہ این آر او دے دو ہم عدم اعتماد واپس لے لیں گے۔ لیکن قوم فیصلہ کر چکی کہ نواز شریف اور فضل الرحمٰن کو این آر او نہیں ملے گا۔
پریڈ گراؤنڈ میں کارکنان کی آمد کا سلسلہ جاری ہے: پی ٹی آئی
پاکستان تحریک انصاف نے پریڈ گراؤنڈ کی ایک ویڈیو جاری کی ہے جس میں پی ٹی آئی کے کارکنان کی بڑی تعداد کو دیکھا جا سکتا ہے۔
پی ٹی آئی کا کہنا ہے کہ جلسہ گاہ میں کارکنان کی آمد کا سلسلہ جاری ہے۔
کہاں ہیں وہ دس لاکھ لوگ؟ خورشید شاہ کا سوال
پاکستان پیپلز پارٹی کے رہنما سید خورشید شاہ نے تحریک انصاف کے اسلام آباد جلسے کی ایک ویڈیو شیئر کرتے ہوئے سوال کیا ہے کہ کہاں ہیں دس لاکھ لوگ؟
یاد رہے کہ تحریک انصاف نے دعویٰ کیا تھا کہ اسلام آباد کے پریڈ گراؤنڈ میں دس لاکھ افراد جمع ہوں گے۔
اسلام آباد: مسلم لیگ نواز کی اعلی قیادت چوہدری شجاعت سے ملاقات کرے گی
مسلم لیگ نواز کی مرکزی قیادت آج حکومتی اتحادی مسلم لیگ ق کے سربراہ چوہدری شجاعت حیسن سے ملاقات کرے گی۔
اسلام آباد میں چوہدری شجاعت کی رہاش گاہ پر ہونے والی اس ملاقات میں ملکی سیاسی صورت حال اور تحریک عدم اعتماد پر تبادلہ خیال کیا جائے گا۔
یہ ملاقات ایسے وقت میں ہو رہی ہے جب شہر اقتدار میں حکومت اور حزب اختلاف بڑے عوامی جلسوں کا انعقاد کررہی ہے اور پیر کو وزیراعظم کے خلاف تحریک عدم اعتماد پر قومی اسمبلی کا باقاعدہ اجلاس منعقد ہونے جا رہا ہے۔
اس ملاقات میں مسلم لیگ ن کی قیادت مسلم لیگ ق کے رہنماؤں کو تحریک عدم اعتماد میں حزب اختلاف کی حمایت پر قائل کرنے کی کوشش کرے گی۔
رپورٹس کے مطابق دونوں جماعتوں کے درمیان ہونے والی ابتدائی بات چیت کے نتیجے میں طے پانے والے نکات کی نواز شریف نے منظوری دے دی ہے۔ جس کا اعلان اس ملاقات کے بعد کیا جاسکتا ہے۔