رسائی کے لنکس

ملائیشیا اور امریکہ کے درمیان 10 ارب ڈالر کے تجارتی معاہدے


صدرٹرمپ وہائٹ ہاؤس میں ملائشیا کے وزیر اعظم نجیب رزاق کا خیر مقدم کر رہے ہیں۔ 12 ستمبر 2017
صدرٹرمپ وہائٹ ہاؤس میں ملائشیا کے وزیر اعظم نجیب رزاق کا خیر مقدم کر رہے ہیں۔ 12 ستمبر 2017

ملائیشیا کے وزیر اعظم نے کہا ملک کے پنشن فنڈ کے 7 ارب ڈالر سے پہلے ہی امریکہ میں سرمایہ کاری کی جا چکی ہے جب کہ مزید تین سے چار ارب ڈالر کی سرمایہ کاری کا منصوبہ ہے۔

صدر ٹرمپ نے وہائٹ ہاؤس میں ملیشیا کے وزیر اعظم نجیب رزاق کا خیر مقدم کرتے ہوئے اپنے ملک میں سرمایہ کاری کرنے اور دہشت گردی کے خلاف لڑنے کی کوششوں کو سراہا۔

صدر ٹرمپ نے منگل کے روز کہا کہ وہ اور انڈونیشیا کے وزیر اعظم نجیب بہت بڑے تجارتي معاہدوں پر کام کررہے ہیں جن میں 10 ارب سے 20 ارب ڈالر مالیت کے بوئنگ طیارے اور جنرل الیکٹرک جیٹ انجن شامل ہیں۔

وزیر اعظم نجیب نے تصدیق کی کہ پانچ سال کی مدت میں اس معاہدے کی مالیت 10 ارب ڈالر سے بڑھ جائے گی۔ انہوں نے بتایا کہ یہ طیارے سرکاری کمپنی ملائیشیا ایئر لائنز میں شامل کیے جائیں گے۔

ان کا کہنا تھا کہ ہم نے 737 قسم کے 25 اور 787 ماڈل کے 8 طیاروں کے سودے کیے ہیں جب کہ 737 ماڈل کے مزید 25 طیارے خریدے جا سکتے ہیں۔

انہوں نے کہا کہ وہ ایئر ایشیا سے بھی جی ای انجن خریدنے کے لیے کہیں گے۔

ملائیشیا کے وزیر اعظم نے کہا ملک کے پنشن فنڈ کے 7 ارب ڈالر سے پہلے ہی امریکہ میں سرمایہ کاری کی جا چکی ہے جب کہ مزید تین سے چار ارب ڈالر کی سرمایہ کاری کا منصوبہ ہے۔

نجیب رزاق نے کہا ہے کہ ان کا ملک داعش اور القاعدہ جیسے دہشت گرد گروپس کے خلاف لڑنے کے لیے پر عزم ہے اور یہ کہ دہشت گرد امریکہ اور ملائیشیا دونوں کے دشمن ہیں۔ہم دنیا کے اس حصے کو دہشت گردوں سے محفوظ رکھنے کے لیے ہر ممکن اقدامات کریں گے۔

انہوں نے صدر ٹرمپ پر زور دیا کہ وہ اعتدال اور ترقی پسند مسلم حکومتوں کی مدد کے لیے اسلامی دنیا کے عوام کے دل اور ذہن جیتنے کی کوشش کریں۔ ان کا کہنا تھا کہ اسلام کا حقیقی چہرہ آپ ملائیشیا میں دیکھ سکتے ہیں۔

XS
SM
MD
LG