رسائی کے لنکس

logo-print

مشروب کی مانگ میں اضافہ افریقہ کے غریب کاشتکاروں کے لیے رحمت


مشروب کی مانگ میں اضافہ افریقہ کے غریب کاشتکاروں کے لیے رحمت

مشروب تیار کرنے والی امریکی کمپنی کوکا کولا نے اعلان کیا ہے کہ وہ گیٹس فاؤنڈیشن کے ساتھ مل کر کینیا اور یوگنڈا میں ایک پروگرام شروع کر رہی ہے جس سے آموں اور دوسرے پھلوں کی پیداوار کے ساتھ ساتھ کاشتکاروں کی آمدن میں بھی اضافہ ہو گا ۔ چار سال پر محیط اس پروگرام کے تحت افریقہ میں پیدا ہونے والے پھلوں کو کمپنی اپنے مشروب کی تیاری میں استعمال کرے گی۔خود کوکا کولا کا بھی کہنا ہے کہ عالمی سطح پر پھلوں کے مشروب کی بڑھتی ہوئی مانگ کے باعث اسے پانی پیداوار میں اضافے کی ضرورت ہے۔

توقع ہے کہ اس اقدام سے ایک طرف تو فصلوں کا معیار بہتر ہو گا اور دوسری طرف غربت اور بھوک جیسے مسائل کے حل میں مدد حاصل ہو گی۔یہ منصوبہ بل گیٹس اور ان کی اہلیہ میلنڈا گیٹس کی فاؤنڈیشن کے ساتھ ایک اشتراک عمل سے تقریباََ ایک کروڑ ڈالر لاگت سے شروع کیا جارہا ہے جس کا ہدف 2014ء تک تقریباً 50ہزارکاشتکاروں کی آمدن کو دگنا کرنا ہے۔

پروگرام کے لیے گیٹس فاؤنڈیشن 75لاکھ ڈالر جب کہ باقی کی گرانٹ کوکا کولا اور اس کی پارٹنر کمپنی سیبکو فراہم کرے گی۔

دنیا بھر میں غربت کے خاتمے اور سماجی ترقی کے لیے کام کرنے والی گیٹس فاؤنڈیشن کی یہ کوشش خاص طور پر کاشتکاروں کی امداد کے پروگرام کا حصہ ہے۔

اب تک فاؤنڈیشن نے دنیا بھر میں کاشتکاروں کی مدد کے لیے ایک ارب 40کروڑ کی رقم فراہم کی ہے جس کا زیادہ تر حصہ ایشیا اور سب سہارن افریقہ کو حاصل ہوا ہے۔

XS
SM
MD
LG