کرونا وائرس: عالمی معیشت کو دو اعشاریہ سات کھرب ڈالر کا نقصان ہوگا؟
کرونا وائرس کی وبا عالمی معیشت کو کتنا نقصان پہنچائے گی اس بارے میں متعلقہ عالمی اداروں کے اعداد و شمار میں کافی فرق نظر آتا ہے۔
بلوم برگ کا تخمینہ ہے کہ اس وبا کے ختم ہونے تک دنیا کو معاشی طور پر دو اعشاریہ سات کھرب امریکی ڈالر کے مساوی نقصان ہو چکا ہوگا، جبکہ ایشین ڈیولپمنٹ بنک کے مطابق معاشی نقصان کی سطح کہیں کم ہوگی۔
معاشیات کے ایک ماہر اور جاگو یونیورسٹی میں مارکٹنگ کے پروفیسر ڈاکٹر ظفر بخاری نے وائس آف امریکہ سے گفتگو کرتے ہوئے کہا ہے کہ صرف تین ملکوں یعنی امریکہ، چین اور بھارت کی مجموعی معیشت کا ہجم چون کھرب ڈالر سے زیادہ ہے جبکہ باقی دنیا کو بھی اگر اس میں شامل کر لیا جائے، تو اس کا ہجم بہت زیادہ بڑھ جاتا ہے۔
انکا کہنا تھا کہ وہ سمجھتے ہیں کہ کرونا وائرس کی قیمت عالمی معیشت میں تین سے پانچ فیصد کمی کی صورت میں ادا کرنی پڑے گی۔
انہوں نے بتایا کہ امکان یہ ہے کہ ایسی صورت حال میں سب سے زیادہ نقصان افریقی ممالک کو اٹھانا پڑے گا، کیونکہ چین کی صنعت کا خام مال زیادہ تر وہیں سے آتا ہے اور اسوقت چینی صنعت دشواریوں کا شکار ہے۔
ڈاکٹر ظفر بخاری کا مزید کہنا تھا کہ ماہرین کا خیال ہے کہ اس سال اگست تک کرونا وائرس کے مسئلے پر قابو پا لیا جائے گا، جسکے بعد ساری دنیا میں معاشی سرگرمیاں پھر سے شروع ہو سکیں گی۔
خیال رہے کرونا وائرس چین سے شروع ہوا تھا جو دنیا کی ایک بہت بڑی معیشت ہے اور وہاں اس وبا کے پھیلاؤ کو روکنے کے لئے لاک ڈاؤن کے بعد جن جن ملکوں میں یہ وائرس جاتا رہا وہاں لاک ڈاؤن کی صورت حال بنتی گئی۔
اسوقت صورت حال یہ ہے کہ ایئرلائنوں کی پروازیں معطل ہیں لوگوں کی آمد و رفت بند ہے، سیاحت نہ ہونے کے برابر ہے اور تقریباً ہر ملک میں جہاں یہ وائرس پہنچا ہے اسے محدود کرنے کے لئے کاروباری سرگرمیاں معطل کر دی گئی ہیں۔
اٹلی کے اخبار میں 10 صفحات کے تعزیت نامے
کرونا وائرس سے متاثر اٹلی میں روزانہ سیکڑوں افراد ہلاک ہورہے ہیں۔ لاک ڈاؤن کی وجہ سے ہر قسم کی سرگرمیاں معطل ہیں اور اخبارات کے پاس شائع کرنے کے لیے زیادہ مواد نہیں۔ ان حالات میں اٹلی کے ایک اخبار میں 10 صفحات کے تعزیت نامے شائع ہوئے ہیں۔
اٹلی کا شمالی علاقہ لومبارڈو وائرس سے شدید متاثر ہوا ہے۔ اس کے اخبار لیکو ڈی برگامو میں چند کالم یا ایک آدھ صفحات پر تعزیت نامے شائع ہوتے تھے۔ لیکن جیسے جیسے وائرس پھیلتا گیا، تعزیت ناموں کی تعداد زیادہ ہوتی گئی۔ 13 مارچ کی اشاعت میں پورے 10 صفحات ہلاک ہونے والوں کی یاد میں شائع کیے گئے۔
اٹلی میں اتوار کو 368 اور پیر کو 349 افراد ہلاک ہوئے جس کے بعد مرنے والوں کی تعداد 2100 سے زیادہ ہوگئی جبکہ وائرس کے مصدقہ کیسز کی تعداد 28 ہزار ہے۔
مونزا اسپتال کے ڈاکٹر روبرٹو رونا نے صورتحال کے بارے میں کہا کہ ہمیں بیماری کی لہر نہیں، سونامی کا سامنا ہے۔
- By علی فرقان
کیا تفتان قرنطینہ کے ناکافی انتظامات سے کرونا وائرس پھیلا؟
پاکستان میں کرونا وائرس کے مریضوں کی تعداد چند ہی روز میں کئی گنا بڑھ گئی ہے۔ حکام کا کہنا ہے کہ ان مریضوں میں اکثریت اُن کی ہے جو ایران سے پاکستان پہنچے تھے۔ انہیں سرحدی علاقے تافتان میں قرنطینہ میں رکھا گیا تھا۔
ایران سے آنے والے زائرین کو تفتان کے قرنطینہ میں 14 روز تک رکھا گیا، جس کے بعد انہیں اپنے اپنے صوبوں میں منتقل کیا گیا۔
پاکستان کے صوبہ سندھ کے وزیر اعلٰی مراد علی شاہ نے تافتان قرنطینہ میں ناقص انتظامات کا بیان دیا تھا۔ جس کے بعد وفاقی حکومت اور پاکستان کے مختلف صوبوں کے درمیان انتظامات کے معاملے پر لفظی نوک جھونک جاری ہے۔
ناقدین کا یہ الزام ہے کہ تفتان قرنطینہ میں عالمی معیار کے مطابق انتظامات نہیں تھے۔ مریضوں کو ایک دوسرے کے بہت قریب رکھا گیا۔ حالاں کہ ایسی صورتِ حال میں مریضوں کو الگ تھلگ رکھا جاتا ہے۔
پاکستان میں نماز جمعہ کے اجتماعات محدود کرنے کا فیصلہ
پاکستان کی حکومت نے اسلامی نظریاتی کونسل اور علما کی مشاورت سے نماز جمعہ کے اجتماعات کو بھی محدود کرنے کا فیصلہ کیا ہے۔ البتہ نماز جمعہ کے اجتماعات پر پابندی کا فیصلہ نہیں کیا گیا۔
کابینہ اجلاس کے بعد وزیر مذہبی اُمور نورالحق قادری نے حکومتی اقدامات کا بھی اعلان کیا جس میں انہوں نے علما حضرات سے درخواست کی کہ نماز جمعہ کے دوران مختصر وقت کے لیے صرف عربی خطبہ پڑھیں۔ اردو یا کسی اور زبان میں تقاریر نہ کی جائیں۔ نماز جمعہ ادا کرنے والے گھروں سے وضو کرکے آئیں اور سنتیں بھی گھر پر ادا کریں۔
وزیر اعظم عمران خان کی زیرِ صدارت وفاقی کابینہ کا اجلاس ہوا جس میں کابینہ نے قومی سلامتی کمیٹی کے فیصلوں کی توثیق کر دی۔ اسکولوں میں چھٹیاں، سنیما، شادی ہالز اور اجتماعات پر پابندی کے فیصلے کی توثیق کر دی گئی ہے۔
اجلاس میں وزیراعظم عمران خان کا کہنا تھا کہ اس وقت اتحاد اور لوگوں کو آگاہی فراہم کرنے اشد ضرورت ہے۔
پاکستان کے وزیر ہوا بازی غلام سرور خان کا کہنا ہے کہ لندن یا کسی اور جگہ سے آنے والے مسافروں کو کرونا ٹیسٹ کرانے کے بعد پاکستان میں داخل ہونے کی اجازت دی جائے گی۔ انہوں نے کہا کہ تمام جہازوں کو انفیکشن فری بنانے کے لیے ان میں ہر فلائٹ کے بعد جراثیم کش اسپرے کیا جارہا ہے۔
پاکستان میں وفاقی کابینہ نے پاکستان کے صرف تین ہوائی اڈوں کے ذریعے بین الاقوامی پروازیں چلانے کے فیصلہ پر نظرثانی کرتے ہوئے تربت اور گوادر کے علاوہ دیگر ایئر پورٹس بھی بین الاقوامی پروازوں کے لیے کھول دیے ہیں۔
پاکستان علما کونسل نے فتویٰ دیا ہے کہ ملک میں تمام سیاسی اور مذہبی اجتماعات فوری طور پر ملتوی کر دیے جائیں۔
پاکستانی فوج نے اعلان کیا ہے کہ سول اداروں کے ساتھ تعاون کے لیے تمام کمانڈرز کو ہدایت کردی گئی ہے اور پاکستان فوج کے ہیلتھ یونٹس کرونا وائرس کے حوالے سے مختلف اقدامات میں حکومت کی مدد کریں گے۔