پاکستان میں کرونا سے مزید 44 اموات، مثبت کیسز کی شرح کم ہونے لگی

وزیرِ تعلیم سندھ سعید غنی کرونا وائرس میں مبتلا

پاکستان کے صوبہ سندھ کے وزیرِ تعلیم اور پاکستان پیپلز پارٹی کے اہم رہنما سعید غنی کا کہنا ہے کہ انہوں نے گزشتہ روز کرونا وائرس کا ٹیسٹ کرایا تھا جس کی رپورٹ مثبت آئی ہے۔

صوبائی وزیر سعید غنی نے کرونا ٹیسٹ مثبت آنے پر ایک بیان میں کہا کہ انہیں حیرت ہے کہ ان کا کرونا ٹیسٹ پازیٹو آیا ہے۔

صوبائی وزیر کے مطابق انہیں فی الحال کوئی ایسی ظاہری علامات نہیں جس سے اس بیماری کا معلوم ہو۔

انہوں نے بتایا کہ انہیں کھانسی، نزلہ، بخار بالکل نہیں۔

سعید غنی کا کہنا تھا کہ ٹیسٹ مثبت آنے کے بعد انہوں نے فوری طور پر تمام سرگرمیاں ترک کر دیں اور وہ قرنطینہ میں چلے گئے ہیں۔

انہوں نے عوام سے اپیل کی ہے کہ وہ صوبائی حکومت کی جانب سے عائد کی گئی پابندیوں پر سختی سے عمل کریں تاکہ اس وبا کو پھیلنے سے بچا جاسکے۔

واضح رہے کہ پاکستان میں اس وبا سے زیادہ متاثر ہونے والا صوبہ سندھ ہی ہے جہاں اب تک اس کے مریضوں کی تعداد 350 سے تجاوز کرچکی ہے۔

صوبائی وزیر تعلیم میں کرونا وائرس کی تشخیص کے بعد صوبائی کابینہ کے دیگر ارکان میں بھی تشویش کی لہر دوڑ گئی ہے۔

خیبرپختونخوا میں جزوی لاک ڈاؤن میں توسیع

پاکستان کے صوبے خیبر پختونخوا کی حکومت نے کرونا وائرس کے کیسز میں اضافے کے پیشِ نظر صوبے بھر میں جزوی لاک ڈاؤن میں آئندہ اتوار تک توسیع کرنے کا فیصلہ کیا ہے۔

وزیر اعلیٰ محمود خان کی زیرِ صدارت پیر کو اعلیٰ سطح کا اجلاس ہوا جس کے دوران کرونا وائرس سے پیدا شدہ صورتِ حال اور اس سے نمٹنے کے لیے اقدامات کا جائزہ لیا گیا۔

اجلاس کے دوران گزشتہ تین روز سے جاری جزوی لاک ڈاؤن کے بہتر نتائج کو دیکھتے ہوئے اس میں 29 مارچ تک توسیع کا فیصلہ کیا گیا ہے۔

جزوی لاک ڈاؤن کے دوران صوبے کے تمام تجارتی مراکز، ہوٹل اور ریستوران بند رہیں گے جب کہ صوبے بھر میں بین الاضلاع پبلک ٹرانسپورٹ پر بھی پابندی ہو گی۔

حکام کے مطابق صوبے بھر میں کھانے پینے کی اشیاء، میڈیکل اسٹورز، ایمبولینسز اور سامان سے لدھی ہوئی گاڑیاں اس پابندی سے مستثنیٰ ہوں گی۔

کراچی میں مکمل لاک ڈاؤن

پنجاب میں بھی سخت پابندیوں کا اعلان

پاکستان کے سب سے بڑے صوبے پنجاب کے وزیراعلیٰ عثمان بزدار نے اعلان کیا ہے کہ 24 مارچ کی صبح نو بجے سے چھ اپریل تک صوبے بھر میں تمام شاپنگ مالز بند رہیں گے اور ڈبل سواری پر پابندی ہوگی۔

صوبائی کابینہ کے اجلاس کے بعد پریس کانفرنس کے دوران عثمان بزدار نے بتایا کہ پنجاب میں دو ہفتے کے لیے تمام سیاحتی مقامات بند رہیں گے تاہم فوڈ سپلائی چین برقرار رکھنے کا فیصلہ کیا گیا ہے جس کے تحت سبزی منڈی، کریانہ اسٹورز، بیکریاں اور میڈیکل اسٹورز کھلے رہیں گے۔

وزیر اعلیٰ پنجاب نے کہا کہ پابندیوں کے دوران کرفیو جیسی صورتِ حال نہیں ہو گی اور ایسا بھی نہیں ہو گا کہ گھروں سے باہر نہیں نکل سکتے۔