پابندی کے باوجود کئی مساجد میں نمازِ جمعہ کے اجتماعات
کرونا وائرس کا پھیلاؤ روکنے کے لیے پاکستان کے مختلف شہروں میں نمازوں کے اجتماعات پر بھی پابندی لگائی گئی ہے۔ جمعے کو بیشتر شہریوں نے گھر پر ہی نماز ادا کی لیکن بعض مساجد میں پابندی کے باوجود نمازِ جمعہ کے اجتماعات ہوئے۔ البتہ مساجد میں نمازیوں کی تعداد معمول سے کافی کم تھی۔
پاکستانی حکومت کا کرونا ریلیف ٹائیگر فورس بنانے کا فیصلہ
پاکستان کے وزیر اعظم عمران خان نے نوجوان رضاکاروں پر مشتمل 'کرونا ریلیف ٹائیگر فورس' تشکیل دینے کا اعلان کیا ہے۔ عمران خان نے نوجوانوں سے کہا ہے کہ وہ 31 مارچ تک خود کو رضا کاروں کی اس ٹیم میں رجسٹر کر سکتے ہیں۔
اسلام آباد میں نیوز کانفرنس کرتے ہوئے عمران خان کا کہنا تھا کہ پاکستان میں صورتِ حال اب بھی دُنیا کے دوسرے ملکوں کے مقابلے میں بہتر ہے۔ البتہ مشکل صورتِ حال سے نمٹنے کے لیے یہ رضاکار فورس تشکیل دی جا رہی ہے، جو لوگوں کو گھروں میں کھانا اور دیگر اشیائے ضروریہ پہنچائیں گے۔
پاکستان کی حکومت نے بین الصوبائی گڈز ٹرانسپورٹ کی نقل و حمل پر پابندی ہٹانے کا بھی فیصلہ کیا ہے۔ کھانے پینے کی اشیا تیار کرنے والی فیکٹریوں کو بھی کھولنے کا حکم دیا گیا ہے۔
حکومت نے کرونا ریلیف فنڈ قائم کرنے کا بھی اعلان کیا ہے۔
کراچی: شہریوں کا نماز جمعہ کی مسجد میں ادائیگی پر اصرار
سندھ حکومت نے صوبے میں نمازوں کے اجتماعات محدود کرنے کی ہدایت کی ہے۔ لیکن نمازِ جمعہ سے قبل کراچی کی مشہور میمن مسجد کے باہر شہریوں کی بڑی تعداد جمع ہو گئی اور مسجد میں نماز ادا کرنے پر اصرار کیا۔ پولیس افسر شہریوں کو سمجھاتے رہے اور گھر جا کر نماز ادا کرنے کی اپیل کرتے رہے۔
- By روشن مغل
پاکستانی کشمیر میں پابندی کے باوجود جمعے کے اجتماعات
پاکستان کے زیرِ انتظام کشمیر میں حکومتی پابندی کے باوجود مساجد میں نماز جمعہ کے اجتماعات ہوئے۔ تاہم زیادہ تر مساجد میں نمازیوں کی حاضری کم رہی۔ چند مساجد میں بارش کے باوجود بڑی تعداد میں لوگوں نے نماز جمعہ ادا کی۔
پاکستان کے زیرِ انتظام کشمیر میں کرونا وائرس کے دو تصدیق شدہ کیسز رپورٹ ہوئے ہیں۔