پاکستان میں 700 سے زیادہ افراد میں وائرس کی تشخیص
ملائیشیا: کرونا کے باعث فوڈ ڈلیوری کے کاروبار میں اضافہ
بھارت میں مزید 96 ہزار سے زیادہ کیسز رپورٹ
بھارت میں گزشتہ چوبیس گھنٹوں کے دوران مزید 96 ہزار سے زیادہ افراد میں کرونا وائرس کی تشخیص ہوئی ہے۔ اس طرح بھارت میں کیسز کی کل تعداد 52 لاکھ سے تجاوز کر گئی ہے۔
وزارتِ صحت کے اعداد و شمار کے مطابق گزشتہ چوبیس گھنٹوں میں کرونا وائرس کے شکار 1174 مریض چل بسے جس کے بعد عالمی وبا سے بھارت میں ہلاکتوں کی مجموعی تعداد 84 ہزار 372 تک پہنچ گئی ہے۔
اعداد و شمار کے مطابق بھارت میں 41 لاکھ سے زیادہ مریض صحت یاب ہو چکے ہیں اور اب بھی ملک میں 10 لاکھ سے زیادہ ایکٹو کیسز ہیں۔
- By محمد ثاقب
ایس او پیز کی خلاف ورزی پر دو درجن سے زائد تعلیمی ادارے بند
پاکستان میں کرونا وائرس سے بچاؤ کی احتیاطی تدابیر کو نظر انداز کرنے پر حکومت نے دو درجن سے زائد تعلیمی ادارے بند کر دیے ہیں جب کہ کئی تعلیمی اداروں کو احتیاطی تدابیر پر مکمل عمل درآمد نہ کرنے پر انتباہ بھی جاری کیا گیا ہے۔
کرونا پر قومی سطح پر نظر رکھنے والی اتھارٹی 'نیشنل کمانڈ اینڈ آپریشن سینٹر' کے مطابق ان میں سے 16 تعلیمی ادارے خیبر پختونخوا، ایک اسلام آباد اور پانچ پاکستان کے زیرِ انتظام کشمیر میں ہیں۔
سندھ کے علاقے مٹیاری میں دو کالجز کے اسٹاف کے آٹھ ارکان کے کرونا ٹیسٹ مثبت آنے پر انہیں سیل کر دیا گیا ہے۔ اسی طرح صوبائی دارالحکومت کراچی میں بھی کئی اسکولوں کو ایس او پیز پر عمل درآمد نہ کرنے پر بند کر دیا گیا ہے۔
سندھ کے محکمۂ صحت کی ترجمان میران یوسف نے وائس آف امریکہ کو بتایا ہے کہ حکومت صورتِ حال پر کڑی نظر رکھے ہوئے ہے اور اگر کسی بھی کلاس میں کسی بچے کا کرونا ٹیسٹ مثبت آتا ہے تو کلاس میں موجود تمام طلبہ اور اس کے قریبی رشتہ داروں کا ٹیسٹ کیا جائے گا۔
ان کے بقول اسی طرح اگر کسی استاد کا ٹیسٹ مثبت آتا ہے تو جن کلاسز کو وہ پڑھا رہے ہیں، ان کے تمام بچون کا ٹیسٹ بھی سرکاری خرچے پر کیا جائے گا۔
ترجمان نے کہا تدریسی عمل بحال کرنا بھی بہت ضروری تھا کیوں کہ طلبہ کو سیکھنے کے عمل سے زیادہ دن دور نہیں رکھا جا سکتا تھا۔
واضح رہے کہ پاکستان میں پہلے مرحلے میں 15 سمتبر سے کالجز، جامعات اور نویں اور دسویں جماعتوں کے لیے اسکولز کھولے گئے ہیں۔ دوسرے اور تیسرے مرحلے میں اس سے چھوٹے کلاسز کے بچوں کا تعلیمی سلسلہ شروع کیا جائے گا۔