اسلام آباد کے علاقے بھارہ کہو اور شہزاد ٹاؤن ڈی سیل
اسلام آباد کی ضلعی انتظامیہ نے کرونا وائرس کیسز سامنے پر سیل کیے گئے علاقے بھارہ کہو اور شہزاد ٹاؤن کو دوبارہ کھول دیا ہے۔
ضلعی انتظامیہ کے مطابق بھارہ کہو اور شہزاد ٹاؤن میں ٹیسٹنگ اور نگرانی کے بعد ان علاقوں کو کھول دیا گیا ہے۔
نوٹی فکیشن میں کہا گیا ہے کہ بلال مسجد، مکی مسجد اور اس سے ملحقہ علاقے بدستور سیل رہیں گے۔ شہزاد ٹاؤن کی گلی نمبر چھ کو بھی لاک ڈاؤن میں رکھا گیا ہے۔
خیبرپختونخوا میں لاک ڈاؤن اور امداد کے منتظر خواجہ سرا
پاکستان کے صوبے خیبرپختونخوا میں لاک ڈاؤن کے باعث جہاں دیگر طبقات شدید متاثر ہو رہے ہیں۔ وہیں خواجہ سرا بھی شدید مشکلات کا شکار ہیں۔
پشاور میں خواجہ سراؤں کی تنظیم کے سربراہ فرزانہ خان کے مطابق نوبت فاقوں تک آن پہنچی ہے۔ اُن کے بقول بہت سے خواجہ سرا کرایے کی رہائش گاہوں میں رہتے تھے۔ لیکن کوئی ذریعہ معاش نہ ہونے کے باعث اب وہ کرایہ دینے سے بھی قاصر ہیں۔ مالک مکان اُنہیں مکان خالی کرنے پر مجبور کر رہے ہیں۔
فرزانہ خان کے مطابق صرف پشاور میں خواجہ سراؤں کی تعداد 4500 سے زیادہ ہے۔ پشاور کے علاوہ صوبے کے دیگر اضلاع میں بھی خواجہ سراؤں کی بڑی تعداد مقیم ہے۔ یہ اپنے خاندان سے الگ تھلگ انفرادی طور پر یا ٹولیوں کی صورت میں مختلف رہائشی علاقوں میں کرایے کے کمروں میں رہائش اختیار کرتے ہیں۔
پشاور کے علاقوں ہشت گری، ڈنگری، بھانہ ماڑی، قصہ خوانی، گلبہار، گلبرگ، یونیورسٹی روڈ سمیت مختلف علاقوں میں یہ زیادہ تعداد میں آباد ہیں۔
کرونا وائرس کے باعث لاک ڈاؤن سے دیگر مزدور طبقوں کی طرح یہ کمیونٹی بھی مسائل سے دوچار ہے۔ ان کا ذریعہ معاش شادی بیاہ اور دیگر خوشی کے مواقعوں سے منسلک ہوتا ہے۔ لیکن لاک ڈاؤن کے باعث نظام زندگی مکمل طور پر مفلوج ہے۔
جماعت اسلامی کے امیر سراج الحق کی ہدایت پر ان خواجہ سراؤں کی مدد بھی کی گئی ہے۔ لیکن بہت سے خواجہ سرا اب بھی امداد کے منتظر ہیں۔
ایران: مسجد ماسک بنانے کے کارخانے میں تبدیل
ایران مشرق وسطیٰ کا وہ ملک ہے جو کرونا وائرس سے سب سے زیادہ متاثر ہے۔ ایران میں اس وبا سے لگ بھگ چار ہزار افراد ہلاک ہو چکے ہیں جب کہ 64 ہزار سے زائد مصدقہ کیسز سامنے آ چکے ہیں۔
ایسے میں جب ایران کو بین الاقوامی پابندیوں کا سامنا ہے۔ ملک میں لوگ اپنی مدد آپ کے تحت اسپتالوں کے لیے سامان تیار کر رہے ہیں۔ دارالحکومت تہران کی ایک مسجد میں باقاعدہ ایک کارخانہ بنایا گیا ہے جہاں اسپتالوں کے لیے ماسک اور دیگر اشیا تیار کی جا رہی ہیں۔
اپریل کے آخر تک اسپتالوں پر دباؤ بڑھے گا: عمران خان
پاکستان کے وزیر اعظم عمران خان نے خدشہ ظاہر کیا ہے کہ اپریل کے آخر تک ملک کے اسپتالوں میں دباؤ بڑھنے کا امکان ہے۔
کوئٹہ میں نیوز کانفرنس کرتے ہوئے عمران خان کا کہنا تھا کہ بلوچستان میں اس وبا کی شدت کم ہو گی لیکن لاہور، کراچی، فیصل آباد اور راولپنڈی سمیت ملک کے دیگر بڑے شہروں کے اسپتالوں میں دباؤ بڑھے گا۔
عمران خان کا کہنا تھا کہ 14 اپریل کو صوبے لاک ڈاؤن کے حوالے سے فیصلہ کریں گے کہ وہ کس شعبے کو کھولنا چاہتے ہیں۔
اُن کا کہنا تھا کہ کچھ ایسے شعبے ہیں جنہیں احتیاطی تدابیر اختیار کر کے کھولا جا سکتا ہے۔ تاکہ لوگوں کو روزگار میسر آ سکے۔
وزیر اعظم عمران خان نے کہا کہ وفاقی حکومت اور صوبوں کے درمیاں اس ضمن میں مکمل رابطہ ہے۔