کرونا وائرس: اپریل میں پاکستانی برآمدات 54 فیصد کم
کرونا وائرس کی عالمی وبا کی وجہ سے دیگر ملکوں کی طرح پاکستان کی برآمدات پر بھی منفی اثر ہوا ہے۔ پاکستان کے ادارہ شماریات کے مطابق اپریل 2019 کے مقابلے میں رواں سال اپریل میں پاکستانی برآمدات میں 54 فی صد کمی ریکارڈ کی گئی ہے۔
اقتصادی ماہرین کا کہنا ہے کہ اگر آئندہ چند ماہ کے دوران پاکستانی برآمدات میں منفی رجحان جاری رہا تو رواں مالی سال کے لیے مقرر کردہ 26 ارب ڈالر کا ہدف حاصل کرنا بہت مشکل ہو گا۔
پاکستان کے ادارہ شماریات کی طرف سے منگل کو جاری کردہ اعداد و شمار کے مطابق پاکستانی برآمدات گزشتہ ماہ 95 کروڑ 70 لاکھ ڈالر تھی جب کہ اپریل 2019 میں پاکستانی بٖرآمدات کا حجم ایک ارب 80 کروڑ ڈالر تھا۔
دوسری جانب ادارہ شماریات کے مطابق پاکستان کی درآمدات میں بھی کمی ریکارڈ کی گئی ہے۔ گزشتہ مالی سال کے مقابلے میں رواں مالی سال کے پہلے 10 ماہ کے دوران پاکستان کی درآمدات میں 16 فی صد سے زائد کی کمی ریکارڈ کی گئی ہے۔
کرونا وائرس ٹاسک فورس کام کرتی رہے گی: صدر ٹرمپ
صدر ٹرمپ نے بدھ کو کہا ہے کہ وہ چاہتے ہیں کہ غیر معینہ مدت کے لیے ٹاسک فورس اپنا کام کرتی رہے؛ اور یہ کہ ''اسے اب اپنی زیادہ توجہ امریکیوں کو محفوظ رکھنے اور امریکہ میں کاروبار زندگی کو کھولنے پر مرکوز رکھنی ہوگی''۔
اس سے قبل منگل کو صدر ٹرمپ اور نائب صدر پنس نے کہا تھا کہ مئی کے آخر یا جون کے شروع میں ٹاسک فورس کو ختم کر دیا جائے گا، اس کے بجائے متعلقہ محکمے اور حکام اپنی اپنی ذمہ داریاں سنبھال لیں گے۔
مگر اس فیصلے کی فوری مخالفت کو دیکھ کر صدر ٹرمپ نے آج بدھ کو صبح سویرے ایک ٹویٹ پیغام میں کہا کہ ٹاسک فورس بدستور غیر معینہ مدت تک کام کرتی رہے گی۔
بقول ان کے، ''یہ سیکورٹی اور ملک کو دوبارہ کھولنے کے امور پر اپنی توجہ مرکوز رکھے گی۔ ضرورت کے مطابق، ہم اس کے اراکین کی تعداد میں کمی بیشی کرتے رہیں گے۔ ٹاسک فورس ویکسین اور علاج پر بھی توجہ دے گی''۔
برطانیہ: لاک ڈاون میں نرمی سے متعلق اعلان اتوار کو متوقع
برطانوی وزیر اعظم، بورس جانسن کرونا کے مرض سے مکمل صحت یاب ہونے کے بعد پہلی بار پارلیمنٹ کے اجلاس میں شریک ہوئے۔
اراکین سے خطاب کرتے ہوئے، انہوں نے کہا کہ اس دوران حکومت تمام دستیاب سائینسی ڈیٹا کا بغور جائزہ لے گی اور اس کے بعد کوئی فیصلہ کرے گی۔
وزیر اعظم نے کہا کہ انہیں امید ہے کہ نرمی کا اطلاق پیر سے ہو جائے گا۔ انہوں نے ایوان زیریں کے اراکین کو یقین دلایا کہ انہیں تمام صورت حال سے آگاہ رکھا جائے گا۔
اراکین کو فیصلے کے بارے میں حکومت سے ہر طرح کے سوال کرنے کی اجازت ہوگی۔
بورس جانسن نے کہا کہ اگر پابندیوں کو ایسے حالات میں اٹھا لیا جائے جس کے بعد کرونا وائرس لوٹ آئے تو یہ برطانوی معشیت کے لیے تباہ کن ہوگا۔
انہوں نے کہا کہ فیصلے سے قبل سکاٹ لینڈ کی حکومت، حزب اختلاف اور مزدور تنظیموں سے بھی مشورہ کیا جائے گا، تاکہ نرمی کے منصوبے پر موثر طور سے عمل ہو سکے۔
- By قمر عباس جعفری
وبا کے سبب یورپی یونین کو شدید کساد بازاری درپیش ہوگی: ماہرین
یورپی یونین نے بدھ کے روز کہا ہے کہ 27 ملکوں کے اس گروپ کو اس سال کرونا وائرس کی وبا کے سبب شدید نوعیت کی کساد بازاری کا سامنا کرنا پڑے گا۔
وائن لی نے اپنی رپورٹ میں بتایا ہے کہ برسلز میں ایک نیوز کانفرنس میں یورپی یونین کی معیشت سے متعلق کمشنر، پاولاگرنتیلونی نے بتایا ہے کہ توقع یہ کی جا رہی ہے کہ 2021ء میں چھہ فیصد بحالی سے پہلے 2020ء میں یورپی معیشت سات اعشاریہ پانچ فیصد سکڑ جائے گی۔
یورپ ہی نہیں بلکہ دنیا کے ہر خطے میں کرونا وائرس کے سبب معاشی بدحالی کی پیشگوئیاں اس وقت سے ہی کی جا رہی ہیں جب سے اس وائرس نے دنیا کو اپنی لپیٹ میں لیا ہے۔ اور اس حوالے سے دنیا کے ہر خطے کے بارے میں جائزے پیش کئے جا رہے ہیں۔
تمام ماہرین اس بات پر متفق ہیں کہ عالمی معیشت انفرادی ملکوں کی سطح پر بھی اور مجموعی طور پر بھی شدید مشکلات کا شکار ہونے والی ہے۔