- By شمیم شاہد
سابق وفاقی وزیر غلام احمد بلور وائرس سے متاثر
سابق وفاقی وزیر اور عوامی نیشنل پارٹی (اے این پی) کے رہنما حاجی غلام احمد بلور کرونا وائرس سے متاثر ہوئے ہیں۔ ان کے متاثر ہونے کے بعد خاندان کے دیگر افراد کے بھی کرونا وائرس کے ٹیسٹ کیے جا رہے ہیں۔
بلور ہاؤس کے ترجمان نے حاجی غلام احمد بلور کے وائرس سے متاثر ہونے کی تصدیق کی ہے۔
عوامی نیشنل پارٹی کے بیان کے مطابق حاجی غلام احمد بلور کے متاثر ہونے کے بعد ان کے خاندان کے دیگر افراد کے ٹیسٹ کیے جا رہے ہیں۔ غلام احمد بلور کو ان کی رہائش گاہ پر قرنطینہ میں رکھا جائے گا۔
حکومت کا ٹرین سروس بحال کرنے کا اعلان
پاکستان کی ریلویز کے وفاقی وزیر شیخ رشید احمد نے کہا ہے کہ ریلویز کو ٹرینیں چلانے کی اجازت مل گئی ہے۔ پاکستان ریلویز 30 ٹرینیں چلانے جا رہی ہے۔
پشاور میں ذرائع ابلاغ کے نمائندوں سے گفتگو کرتے ہوئے کہا کہ لوگوں کے رش میں اضافہ ہوا تو عید پر خصوصی ٹرین چلائی جا سکتی ہے۔
ان کا مزید کہنا تھا کہ خیبرپختونخوا کے رہنے والے ٹرین میں زیادہ سفر کرتے ہیں۔ پشاور سے تین ٹرینیں چلائی جائیں گی۔
انہوں نے کہا کہ ضرورت محسوس ہوئی تو مزید ٹرینیں بھی چلائی جا سکتی ہیں۔
افریقی ممالک میں مقامی طور پر وینٹی لیٹرز اور طبی آلات کی تیاری
کرونا وائرس سے بچاؤ کے لیے جہاں دنیا کے ترقی یافتہ ممالک میں ایجادات کا سلسلہ جاری ہے۔ وہیں افریقی ممالک میں بھی سائنس دان اور انجینئرز وائرس کا پھیلاؤ روکنے کے لیے کوششوں میں مصروف ہیں۔
افریقی ممالک میں اگرچہ وائرس کے پھیلاؤ کی شرح کم ہے لیکن بعض ملکوں کے اسپتالوں میں رش اور ڈاکٹرز کے پاس حفاظتی آلات نہ ہونے کی شکایات بھی سامنے آتی رہی ہیں۔
انہیں شکایات کے پیشِ نظر کینیا کے دارالحکومت نیروبی کی ٹیکنالوجی کمپنی نے تھری ڈی فیس شیلڈ کا ڈیزائن متعارف کرایا ہے۔ اسے پلاسٹک کی چادر سے جوڑ کر استعمال کیا جا سکتا ہے۔
یہ حفاظتی شیلڈ نیروبی کی ٹیکنالوجی کمپنی 'الٹرا ریڈ ٹیکنالوجیز' کے دو انجینئرز میحول شاہ اور نیول شاہ نے تیار کی ہیں۔