سندھ: دو کالجز میں عملے کے 8 افراد کے ٹیسٹ مثبت
پاکستان کے صوبۂ سندھ کے ضلع مٹیاری میں دو کالجز کے عملے کے آٹھ افراد میں کرونا وائرس کی تشخیص ہوئی ہے۔
وزیرِ تعلیم سندھ سعید غنی نے اپنے ایک ٹوئٹ میں بتایا ہے کہ کالجز کے عملے کے کرونا ٹیسٹ مثبت آنے کے بعد دونوں کالجز کو بند کر دیا گیا ہے۔
کرونا وبا 'کنٹرول سے باہر' ہو چکی ہے: سیکرٹری جنرل اقوام متحدہ
اقوامِ متحدہ کے سیکرٹری جنرل انتونیو گوتیرس نے خبردار کیا ہے کہ کرونا وائرس کی عالمی وبا اب 'کنٹرول سے باہر' ہو چکی ہے۔
انہوں نے کہا ہے کہ کرونا کی مؤثر اور قوتِ خرید میں آنے والی ویکسین کی تیاری کے لیے دنیا کو مل کر کام کرنا ہوگا۔
بدھ کو صحافیوں سے گفتگو کرتے ہوئے انتونیو گوتیرس نے کہا کہ اس وقت دنیا کی سیکیورٹی کے لیے کرونا وائرس ہی سے سب سے بڑا خطرہ ہے۔
ایک طرف جہاں مختلف ممالک میں سائنس دان اور ماہرینِ طب کرونا وائرس کی مؤثر ویکسین تیار کرنے کی کوششیں کر رہے ہیں، اقوامِ متحدہ کے سیکریٹری جنرل نے کہا ہے کہ اس عالمی وبا کے لیے کوئی اکسیر نہیں ہے۔
امریکہ میں کرونا ویکسین کی دستیابی سے متعلق متضاد دعوے
امریکہ میں صدارتی انتخابات کے ماحول میں جہاں ایک طرف کرونا وائرس کے کیسز کی تعداد بڑھ رہی ہے وہیں کرونا ویکسین کے معاملے پر بھی بحث گرم ہے۔
ویکسین کی فراہمی سے متعلق امریکہ کے 'سینٹرز فار ڈیزیز کنٹرول اینڈ پری وینشن' (سی ڈی سی) کے ڈائریکٹر رابرٹ ریڈفیلڈ نے ایک بیان دیا تو صدر ڈونلڈ ٹرمپ نے ان سے اختلاف کرتے ہوئے اس پر ردِعمل دیا ہے۔
امریکی خبر رساں ادارے 'ایسوسی ایٹڈ پریس' کے مطابق رابرٹ ریڈفیلڈ نے کانگریس میں سماعت کے دوران بتایا ہے کہ کرونا کی ویکسین نومبر یا دسمبر میں بہت محدود پیمانے پر دستیاب ہو گی اور ابتدائی طور پر صرف طبّی عملے کے ارکان اور ہائی رسک افراد کو یہ ویکسین دی جائے گی۔ لیکن یہ جلد بڑے پیمانے پر دستیاب نہیں ہوگی۔
- By محمد ثاقب
ایس او پیز کی خلاف ورزی پر دو درجن سے زائد تعلیمی ادارے بند
پاکستان میں کرونا وائرس سے بچاؤ کی احتیاطی تدابیر کو نظر انداز کرنے پر حکومت نے دو درجن سے زائد تعلیمی ادارے بند کر دیے ہیں جب کہ کئی تعلیمی اداروں کو احتیاطی تدابیر پر مکمل عمل درآمد نہ کرنے پر انتباہ بھی جاری کیا گیا ہے۔
کرونا پر قومی سطح پر نظر رکھنے والی اتھارٹی 'نیشنل کمانڈ اینڈ آپریشن سینٹر' کے مطابق ان میں سے 16 تعلیمی ادارے خیبر پختونخوا، ایک اسلام آباد اور پانچ پاکستان کے زیرِ انتظام کشمیر میں ہیں۔
سندھ کے علاقے مٹیاری میں دو کالجز کے اسٹاف کے آٹھ ارکان کے کرونا ٹیسٹ مثبت آنے پر انہیں سیل کر دیا گیا ہے۔ اسی طرح صوبائی دارالحکومت کراچی میں بھی کئی اسکولوں کو ایس او پیز پر عمل درآمد نہ کرنے پر بند کر دیا گیا ہے۔
سندھ کے محکمۂ صحت کی ترجمان میران یوسف نے وائس آف امریکہ کو بتایا ہے کہ حکومت صورتِ حال پر کڑی نظر رکھے ہوئے ہے اور اگر کسی بھی کلاس میں کسی بچے کا کرونا ٹیسٹ مثبت آتا ہے تو کلاس میں موجود تمام طلبہ اور اس کے قریبی رشتہ داروں کا ٹیسٹ کیا جائے گا۔
ان کے بقول اسی طرح اگر کسی استاد کا ٹیسٹ مثبت آتا ہے تو جن کلاسز کو وہ پڑھا رہے ہیں، ان کے تمام بچون کا ٹیسٹ بھی سرکاری خرچے پر کیا جائے گا۔
ترجمان نے کہا تدریسی عمل بحال کرنا بھی بہت ضروری تھا کیوں کہ طلبہ کو سیکھنے کے عمل سے زیادہ دن دور نہیں رکھا جا سکتا تھا۔
واضح رہے کہ پاکستان میں پہلے مرحلے میں 15 سمتبر سے کالجز، جامعات اور نویں اور دسویں جماعتوں کے لیے اسکولز کھولے گئے ہیں۔ دوسرے اور تیسرے مرحلے میں اس سے چھوٹے کلاسز کے بچوں کا تعلیمی سلسلہ شروع کیا جائے گا۔