رسائی کے لنکس

logo-print

نیس ڈیک ایکس چینج کی فیس بک سے معذرت


امریکہ کے ایک بڑے اسٹاک ایکس چینج نے گذشتہ ماہ فیس بک کے شیئرز سرمایہ کاری کے لیے پیش کیے جانے کے موقع پر پیدا ہونے والی تکنیکی خرابی پر معذرت کرتے ہوئے نقصانات کی تلافی کے لیے چار کروڑ ڈالر ادا کرنے کی پیش کش کی ہے۔

فیس بک کے حصص فروخت کے لیے پہلی بار پیش کیے جانے کے وقت سرمایہ کاروں کی کیثر تعداد کے باعث نیویارک کی نیس ڈیک ایکس چینج کا کمپیوٹر نظام پہلے نصف گھنٹے کے دوران شیئرز کی حقیقی قیمت سامنے لانے میں ناکام رہا اور بہت سے سرمایہ کاروں کا کہناہے کہ انہیں یہ معلوم نہیں ہوسکا کہ آیا خرید یا فروخت سے متعلق ان کے آرڈرز پر عمل درآمد کیا جارہاہے یا نہیں۔

نیس ڈیک کے سربراہ رابرٹ گیری فیلڈ کا کہناہے کہ ہمیں اس دوران ناکامی کاسامنا کرنا پڑا ۔

بعض بروکرز اور حریف اسٹاک ایکس چینجز کا کہناہے کہ نیس ڈیک نے 18 مئی کو اس صورت کے باعث ہونے والے نقصانات کے ازالے کے لیے چار کروڑ ڈالر کی پیش کی ہے۔

انہوں نے بتایا کہ نقصان کا تخمینہ 10 کروڑ سے 20 کروڑ ڈالرکے درمیان ہے۔

چونکہ دنیا بھر میں فیس بک کے صارفین کی تعداد 90 کروڑ کے لگ بھگ ہے ، اس لیے بہت سے سرمایہ کاروں کو شیئر کی 38 ڈالر کی تعارفی قیمت بہت پرکشش لگی۔

فروخت کے آغاز کے پہلے ہی گھنٹے میں فیس بک کے شیئر کی قیمت 45 ڈالر تک پہنچ گئی۔ لیکن اس روز کاروبار کے اختتام پر اس کی قیمت میں ہونے والا اضافہ صرف 23 سینٹ رہا۔

اس کے بعد فیس بک کے شیئرز تیزی سے گرنے شروع ہوئے اور جمعرات 7 جون کو یہ شیئرز 27 ڈالر کی قیمت پر دستیاب تھے۔

XS
SM
MD
LG