ہانگ کانگ میں جمہوریت کے حامی اخبار 'ایپل ڈیلی' کی مالک کمپنی اس ہفتے یہ فیصلہ کرنے جا رہی ہے کہ آیا اسے بند کر دیا جائے۔
اخبار کو بند کر نے کی نوبت اس وقت پیش آئی جب حکام نے گزشتہ ہفتے اس کے 23 لاکھ ڈالر کے اثاثے منجمد کر دیے۔ اس سے پہلے 500 سے زیادہ پولیس اہل کاروں نے اخبار کے دفاتر پر چھاپہ مار کر اس کے چیف ایڈیٹر رائن لا اور "ایپل ڈیلی" اور "ڈیجیٹل نیکسٹ" کے چار دیگر منتظمین کو حراست میں لے لیا تھا۔
مارک سمن، ہانگ کانگ کے جیل میں بند، میڈیا کے معروف بزنس مین جمی لائی کے مشیر ہیں۔ انہوں نے ذرائع ابلاغ کو بتایا ہے کہ "نیکسٹ ڈیجیٹل" کے ایگزیکٹیوز پیر کے روز اس صورتِ حال پر بورڈ کی ایک میٹنگ کرنے والے تھے۔
لائی اور چیف ایگزیکیٹو چینگ کم ہنگ پر کسی دوسرے ملک کے ساتھ ساز باز کرنے کا الزام ہے اور ان کی ضمانت کی اپیل مسترد کی جا چکی ہے۔
قانون کے مطابق کسی بھی ایسے شخص کو، جو دہشت گردی، علیحدگی پسندی، ریاست کے خلاف بغاوت یا غیر ملکی قوتوں کے ساتھ ساز باز کا مجرم قرار پائے، عمر قید کی سزا ہو سکتی ہے۔
2019 میں حکومت کے خلاف وسیع احتجاجی مظاہروں کے بعد، جو بعض اوقات پر تشدد بھی ہو گئے، "ایپل ڈیلی" اور اس کے 73 سالہ مالک، گزشتہ برس جون میں چین کے نافذ کردہ قانون کے بعد سے حکام کے نشانے پر ہیں۔
لائی 2019 میں غیر قانونی اجتماعات میں شرکت کے باعث فی الوقت 14 ماہ کی قید بھگت رہے ہیں۔ گزشتہ ماہ حکومت نے "نیکسٹ ڈیجیٹل" میں ان کے اثاثے منجمد کر دیے تھے۔
