رسائی کے لنکس

بھارت کا جیش کے مرکز پر حملے کا دعویٰ، پاکستان کی تردید


خلاصہ

بھارت نے دعویٰ کیا ہے کہ اس نے خیبر پختونخوا کے علاقے بالاکوٹ میں کشمیر میں سرگرم مسلح تنظیم جیشِ محمد کے ایک کیمپ کو بمباری کرکے تباہ کردیا ہے۔

بھارتی ذرائع ابلاغ کے مطابق پیر اور منگل کی درمیانی شب 3:30 بجے کے لگ بھگ 12 بھارتی طیاروں نے لائن آف کنٹرول عبور کرکے پاکستان کی حدود میں کارروائی کی۔

بھارت کی وزارتِ خارجہ نے دعویٰ کیا ہے کہ حملے میں جیشِ محمد کے کئی دہشت گرد، ان کے تربیت کار اور کمانڈر مارے گئے۔

پاکستان نے بھارت کے دعوے کی تردید کرتے ہوئے کہا ہے کہ بھارتی طیارے صرف تین سے چار میل تک لائن آف کنٹرول کے اندر آئے اور پاک فضائیہ کی بروقت کارروائی پر واپس چلے گئے۔

پاکستان نے بھارت کو سرحد کی خلاف ورزی کا جواب دینے کی دھمکی بھی دی ہے۔

12:10 26.2.2019

پاکستان کی فوج نے الزام عائد کیا ہے کہ بھارت کے طیاروں نے اس کی فضائی حدود کی خلاف ورزی کی ہے۔

پاکستانی فوج کے ترجمان میجر جنرل آصف غفور نے ٹوئٹر پر کہا ہے کہ پاکستانی فضائیہ کے طیاروں کی فوری کارروائی پر بھارتی طیارے واپس چلے گئے۔

12:12 26.2.2019

بھارتی طیارے تین سے چار میل تک اندر آئے: پاکستان

پاکستانی فوج کے ترجمان میجر جنرل آصف غفور نے کہا ہے کہ بھارتی طیاروں نے پاکستان کے زیرِ انتظام کشمیر کے مظفر آباد سیکٹر میں لائن آف کنٹرول عبور کی اور تین سے چار میل تک اندر آئے۔

منگل کی صبح اپنے ٹوئٹس میں فوج کے ترجمان نے دعویٰ کیا کہ بھارتی طیارے پاک فضائیہ کی بروقت کارروائی کے نتیجے میں فوراً ہی واپس چلے گئے۔

ترجمان نے کہا کہ بھارتی طیاروں نے واپس جاتے وقت جلدی میں اپنا پے لوڈ (طیاروں پر موجود گولہ بارود) بھی گرادیا جو بالاکوٹ کے نزدیک ایک کھلے علاقے میں گرا ہے۔

فوجی ترجمان نے اس مقام کی تصاویر بھی اپنے ٹوئٹر اکاؤنٹ پر جاری کی ہیں جہاں ان کے مطابق بھارتی طیاروں کا 'پے لوڈ' گرا۔

ترجمان نے کہا ہے کہ واقعے میں کوئی جانی یا مالی نقصان نہیں ہوا ہے اور نہ ہی کسی عمارت کو کوئی نقصان پہنچا ہے۔

12:15 26.2.2019

'پاکستان کو اپنے دفاع میں جواب دینے کا حق ہے'

پاکستان کے وزیرِ خارجہ شاہ محمود قریشی نے خبردار کیا ہے کہ پاکستان اپنے دفاع میں جواب دینے کا حق رکھتا ہے۔

منگل کو دفترِ خارجہ میں ایک ہنگامی اجلاس کے بعد صحافیوں سے مختصر گفتگو میں وزیرِ خارجہ نے کہا کہ بھارت کی کارروائی لائن آف کنٹرول کی خلاف ورزی ہے جس کا پاکستان جواب دینے کی صلاحیت اور حق رکھتا ہے۔

شاہ محمود قریشی (فائل فوٹو)
شاہ محمود قریشی (فائل فوٹو)

انہوں نے کہا کہ پاکستان کے وزیرِ اعظم عمران خان نے صورتِ حال پر غور کے لیے دن 11 بجے اعلیٰ سطحی اجلاس بلایا ہے جس میں صورتِ حال پر غور کیا جائے گا۔

وزارتِ خارجہ کے مطابق دفترِ خارجہ میں ہونے والے اجلاس میں خارجہ امور کے سابق سیکریٹریز اور سابق سفیروں نے بھی شرکت کی۔

12:17 26.2.2019

بھارت کا دہشت گردوں کے کیمپ تباہ کرنے کا دعویٰ

بھارت کی حکومت نے تاحال پاکستان کے الزامات پر کوئی باضابطہ ردِ عمل نہیں دیا ہے۔

لیکن بھارتی ذرائع ابلاغ نے دعویٰ کیا ہے کہ بھارتی فضائیہ کے طیاروں نے پاکستان کے زیرِ انتظام کشمیر میں دہشت گردوں کے اہم تربیتی کیمپس پر بمباری کرکے انہیں تباہ کردیا ہے۔

بھارتی طیارے نئی دہلی میں یومِ جمہوریہ کے موقع پر پریڈ کے دوران پرواز کر رہے ہیں۔ (فائل فوٹو)
بھارتی طیارے نئی دہلی میں یومِ جمہوریہ کے موقع پر پریڈ کے دوران پرواز کر رہے ہیں۔ (فائل فوٹو)

بھارتی خبر رساں ادارے 'اے این آئی' کے مطابق اسے بھارتی فضائی کے ذرائع نے بتایا ہے کہ کارروائی میں میراج 2000 ساخت کے 12 طیاروں نے حصہ لیا۔

اے این آئی کی رپورٹ کے مطابق بھارتی طیاروں نے نے لائن آف کنٹرول کے پار دہشت گردوں کے ٹھکانوں پر 1000 کلو گرام بم گرائے اور انہیں مکمل طور پر تباہ کردیا۔

بھارتی ذرائع کے مطابق حملہ پیر اور منگل کی درمیانی شب ساڑھے تین بجے کے لگ بھگ کیا گیا۔

مزید لوڈ کریں

فیس بک فورم

XS
SM
MD
LG