کشمیربحران: قابو پانے میں ہرممکن مدد کی جائے گی: من موہن

بھارت کے زیرِ انتظام کشمیرکےوزیرِ اعلیٰ عمرعبداللہ نے ہفتےکےروز نئی دہلی میں وزیرِاعظم من موہن سنگھ، وزیرِ داخلہ پی چدم برم اور حکمراں اتحاد کی چیرپرسن سونیا گاندھی سے الگ الگ ملاقاتیں کیں اوروہاں کی تازہ صورتِ حال پرتبادلہٴ خیال کیا۔

وزیرِ اعظم نے عمر عبداللہ کو موجود بحران پر قابو پانے میں ہر ممکن مدد کی یقین دہانی کرائی۔

عمر عبداللہ نے سب سے پہلے وزیرِ داخلہ سے ملاقات کی جِس کے بعد میڈیا سے بات کرتے ہوئے اُنھوں نے کہا کہ مزاحمت کی تحریک کو غیر ممالک سے پیسے مل رہے ہیں، ‘جِس کو روکنے کے لیے مزید ٹھوس اقدامات کیے جارہے ہیں۔’

بھارتی وزیرِ داخلہ کے ساتھ اُنھوں نے تفصیلی بات چیت کی ہے اور اُنھیں موجودہ صورتِ حال کے ساتھ ساتھ حالات کو بہتر بنانے کے لیے کیے جانے والے اقدامات سے بھی آگاہ کیا۔

اُنھوں نے مزید کہا کہ پی چدم برم سے اِس پر بھی بات ہوئی ہے کہ نیم مسلح دستوں اور مقامی پولیس کو مزید بہتر آلات دیے جائیں تاکہ وہ مجمع کو بہتر انداز میں کنٹرول کر سکیں اور لوگوں کی ہلاکتیں بھی نہ ہوں۔