رسائی کے لنکس

logo-print

ایران اور چھ عالمی طاقتوں کے درمیان مذاکرات


چھ عالمی طاقتوں نے بغداد میں ایران کے ساتھ مذاکرات شروع کردیے ہیں جن کا مقصد ایران کے جوہری پروگرام کی ممکنہ فوجی استعمال پر پیدا ہونے والےبین الاقوامی کمیونٹی کے خدشات کا حل ڈھونڈنا ہے ۔

یورپی یونین کے ایک ترجمان نے بدھ کے روز کہا کہ چھ عالمی طاقتوں کی جانب سے پیش کی جانے والی تجویز سے ایران کے یورینیم کی 20 فی صد تک افزودگی سے متعلق خدشات دور کرنے میں مدد مل سکتی ہے۔

ایران کا کہناہے کہ اس کا یورینیم کی افزودگی کا کام طبی تحقیق اور بجلی پیدا کرنے کے لیے ہے۔

مغربی اقوام کو خدشہ ہے کہ ایران جلد ہی یورینیم کو 90 فی صد تک افزودہ کرنے میں کامیاب ہوجائے گا اور یہ وہ سطح ہے جو جوہری ہتھیاروں کی تیاری کے لیے درکار ہوتی ہے۔

یورپی یونین کے ترجمان مائیکل من نے چھ عالمی طاقتوں کے گروپ کی جانب سے پیش کردہ تجویز کی تفصیلات نہیں بتائیں۔

اس گروپ میں اقوام متحدہ کی سلامتی کونسل کے چھ مستقل ارکان اور جرمنی شامل ہیں۔

ایران کے وزیر خارجہ علی اکبر صالحی نے بدھ کے روز کہا کہ دباؤ ڈالنے کی مغربی پالیسیاں ان کے ملک پر اثرانداز نہیں ہوسکتیں۔ تہران میں گفتگو کرتے ہوئے انہوں نے کہا مغرب کو اپنی پالیسیوں میں دوستانہ رویے کا اظہار کرنا ہوگا۔

XS
SM
MD
LG