رسائی کے لنکس

logo-print

خیبر ایجنسی سے 34 مزدور اغواء


خیبر ایجنسی سے 34 مزدور اغواء

پاکستانی حکام نے کہا ہے کہ قبائلی علاقے خیبر ایجنسی سے 34 مزدوروں کو نا معلوم مسلح شدت پسندوں نے اغوا کر لیا ہے۔

حکام کے مطابق یہ واقعہ درہ آدم خیل کے علاقے کالاخیل میں پیش آیا۔ اغواء کیے جانے والے مزدوروں میں سے 30 کوئلہ کی ایک کان جب کہ دیگر چار سڑک کی تعمیر کے ایک منصوبے پر کام کرتے تھے۔

کوئلے کی کان میں کام کرنے والے مزدوروں کا تعلق مالاکنڈ ڈویژن کے اضلاع سوات اور شانگلہ سے بتایا جاتا ہے۔

کالا خیل کے علاقے میں کوئلے کی کئی کانیں ہیں جہاں دوسرے علاقوں سے آکر مزدور کام کرتے ہیں۔

اطلاعات کے مطابق کالاخیل میں مقامی قبائلیوں نے حال ہی میں طالبان مخالف لشکر بھی بنائے ہیں تاہم یہ واضح نہیں کہ اغوا کا یہ واقعہ اسی کا شاخسانہ ہے یا اس کی کوئی دوسری وجہ ہے۔

دریں اثناء قبائلی علاقے جنوبی وزیرستان میں جمعہ کو مبینہ امریکہ میزائل حملے میں کم از کم تین مشتبہ جنگجو مارے گئے۔ مقامی قبائلیوں کے مطابق بغیر پائلٹ کے جاسوس طیارے سے انگور اڈہ کے علاقے میں ایک گاڑی پر میزائل داغے گئے۔

XS
SM
MD
LG