پاکستان نے آسٹریلیا کے خلاف ٹی20 سیریز جیت لی

واشنگٹن —  تین ٹی20 میچز کی سیریز کے دوسرے میچ میں پاکستان نے آسٹریلیا کو سنسنی خیز مقابلے کے بعد شکست دے سیریز 0-2 سے جیت لی ہے۔

دبئی میں جمعے کو کھیلے گئے میچ میں پاکستان نے پہلے بیٹنگ کرتے ہوئے مقررہ 20 اوورز میں 4 وکٹوں کے نقصان پر 151 رنز بنائے تھے۔

جواباً آسٹریلیا کی ٹیم بھی مقررہ 20 اوورز میں آٹھ وکٹوں کے نقصان پر 151 رنز بنا سکی۔

میچ ٹائی ہوجانے کے بعد اس کا فیصلہ سپر اوور کے ذریعے ہوا جس میں آسٹریلیا نے پہلے بیٹنگ کرتے ہوئے ایک وکٹ کے نقصان پر 11 رنز بنائے۔ جواباًپاکستان کے عمر اکمل اور عبدالرزاق نے چھ گیندوں پر 12 رنز کا ہدف حاصل کرکے پاکستان کو فتح دلادی۔

اس سے قبل پاکستان نے ٹاس جیت کر پہلے بیٹنگ کا فیصلہ کیا اور عمدہ بیٹنگ کرتے ہوئے آسٹریلیا کو جیت کے لیے 152 رنز کا ہدف دیا۔ کپتان محمد حفیظ اور ناصر جمشید 45، 45 رنز بنا کر آئوٹ ہوئے جب کہ کامران اکمل نے 43 رنز کی ناقابلِ شکست اننگز کھیلی۔

جواباً آسٹریلیا کی بیٹنگ لائن کو پاکستانی بالرز کے سامنے جم کر کھیلنے میں واضح مشکلات درپیش رہیں اور وقفے وقفے سے کینگروز کی وکٹیں گرنے کا سلسلہ جاری رہا۔

پاکستان کی جانب سے عبدالرزاق اور سعید اجمل نے 2، 2 جب کہ سہیل تنویر اور عمر گل نے ایک، ایک وکٹ حاصل کی۔

اس سے قبل سیریز کے پہلے میچ میں پاکستان نے 7 وکٹوں سے فتح حاصل کی تھی۔سیریز کا تیسرا اور آخری میچ پیر کو کھیلا جائے گا۔